Умгьанат Сулейманова
2026-пи йис ихь уьлкейиъ Урусатдин халкьарин сабвалин йисси мялум дапIна. Му йисаз тялукь вуди, Дербент райондиъ «Дагъустан Республикайин варитIан ужуди шиърар урхрур — 2026» конкурсдин муниципальный этап кIули гъубшну. Думу конкурс Дербент райондин КIежюх гъулан кьялан мектебдиъ гъабхьну. Серенжемдин иштиракчйирин хъуркьувалариз кьимат тувбан бадали, Дербент райондин мектебарин вакилар, мялимар, райондин УО-йин пишекрар, шаирар дуфнайи.
Дупну ккунду, конкурс ккебгъайиз КIежхярин мектебдиъ урхурайидари культурайин программара улупну. Баяр-шубари халкьарин арайиъ дуствал адлу апIурайи, багъри чIалариинди вуйи шиърар гъурхнийи, мяълийир, ялхъвнар гъапIнийи ва саб бицIи сягьнара улупнийи.
Программайин кьяляхъ гьар-саб чIал’инди, жаради конкурс кIули гъубшну. Конкурсдин иштиракчйири мектебдин багъри литературайин дарсарин асас программайиъ улупну адру дагъустан шаирарин эсерар гъурхну. Дупну ккундуки, жюрийи иштиракчйирин шиир урхбан саягъназ, улупнайи шиърин мянайиз ва думу деврин дигиш’валариз ва гьякьикьатдиз, хас вуйивализ кьимат туврайи. Маракьлуди кIули гъубшу табасаран чIалниинди шиърар урхбан конкурсдиъ сабпи йишваз КIежюх гъулан мектебдин 10-пи в классдиъ урхурайи Мягьямедова Хадижа (шиклиъ) лайикь гъахьну. Кьюбпи йишв Чинар гъулан 1-пи нумрайин мектебдиъ урхурайи Къурбанова Аминайи гъадабгъну. Шубубпи йишван сагьибар Аьраблинка гъулан мектебдиъ урхурайи Гьяжимурадова Хадижайи ва Дюзляр гъулан мектебдиъ урхурайи Несурова Наидайи гъахьну.
Багарихьди конкурсдиъ сабпи йишв гъадабгъу Хадижа республикайин дережайииъди кIули гъябгъру конкурсдиъ иштирак хьиди. Дугъаз Табасаранарин милли культурайин автономияйин председатель Айваз Аьлихановдира пулин пешкеш ва грамота тувну.
Конкурсдиъ жюрийин вакил вуйи табасаран шаир Эльмира Аьшурбеговайи шиърар гъурху баяр-шубарин чIалнахьна вуйи янашмиш’валикан чан фикрар ачмиш гъапIну.
«Гъийин му конкурсдин асас метлеб – дагъустандин милли чIалар уьрхювал ва дурар артмиш апIувал ву. Гъи, магьа ухьуз рякьюрайиганси, хайлин баяр-шубар бабан чIалназ бахш дапIнайи олимпиадйириъ, конкурсиъ жанлуди иштирак шула. Дупну ккундуки, гъийин девриъ бабан чIалариинди улхурайи баяр-шубари саб гъалатI апIура — кIурайиб ва урхурайиб урус чIалнан нугъат хъади ву. Узу аьхиримжи йисари жюрийин вакил вуди иштирак гъахьи конкурсариъ нугъат хътарди шиир урхури анжагъ сар Хадижа Мягьямедова ву. Дугъаз табасаран чIалнан дарс киврайи мялим, Гьяжибаева Элинайин зегьметназ чухсагъул дупну ккунду. Абйир-бабари ва мялимди зегьмет гъизигиш, ухьхьан ихь бабан чIалар уьрхюз хьибди».
