Нариза ТIаибова

Яркврар табиаьтди ухьуз тувнайи девлет ву. Дурар уьрхбан гъуллугънаъ хьуб гьарсар ватандашдин пак буржарикан ву.

 

Хив райондин ярквран мяишатдин кIулиъ айи Альберт Батмановди субут апIурайиганси, дугъу ва ярашугъари чпин ляхниъ асас серенжемар ярквран девлетар цIа кабхъбахьан уьрхбаз ва яркврарин гьякьнаан вуйи къанунар чIур апIуз мумкинвал тутрувбаз сарф апIура.

– Учу саки гьар йисан райондин администрацияйин кIулиъ айидарихъди яркврариз цIихьан хатIа айи фаслихьна гьязур хьпан ва, цIа кабхъиш, дурар ктIушвбан гьякьнаан тялукь йикьрар йитIурача.

Думу йикьрар РД-йин МЧС-дира, РД-йин ярквран мяишатдин комитетдира тасдикь апIура.
Учу, Хив ва Агъул районарин аьтрафариин ерлешмиш духьнайи 17200 га яркврар уьрхру гъуллугънаъ ача. Йишвариин цIин хатIасузвал уьбхбан бадали, тялукь дружинйирин дестйир тешкил дапIна. Саки гьар йисан ярквран мяишатдин вакиларин регьберваликкди мектебариъ урхурайидарихъди яркврар цIихьан уьрхбакан, дидин девлетлувалин ва хайирлувалин гьякьнаан ачухъ дарсар гъахура. Учуз яркврар цIихьан уьрхбан бадали лазим вуйи шараитар вари ачуз, – гъапну Альберт Батмановди.

Ич сюгьбатнаъ дугъу субут апIурайиси, ккудубшу йисан Хив райондиъ яркврарик цIа кабхъбан дюшюш гъабхьундар.

— Вушра, му жигьатнаан хатIасузвал уьбхюри, учу, яркврариъ цIа кабхъбан дюшюшар арайиз гъафиш кIури, тялукь аьтрафариин улакь хъаъбан метлебниинди Цлахъ, Мажвглиин ва Асккан АрхъитI гъуларин аьтрафариин 8 км манзилнаъ цIихьан уьрхюз лазим вуйи таза рякъяр ккивунча ва Зилдикк, Ккугъ, Дардаркент, Тркал, Мажвглиин, Асккан АрхъитI ва Цнал гъуларихъ 30 км манзилнаъ лазим йишварихьан муганайиз айи рякъяр саб гьял рас гъапIунча.

Яркврар уьрхбан гъуллугънакан гъапиш, 15 га майднариин яркврар лазим дару, гъеерццу гьарар-кюллерихьан марцц гъапIунча. Улупнайи ляхнар тIалабариз тялукь шлуси башламиш апIидича, – аьлава гъапIну дугъу.