Нариза ТIаибова
Улихьна йигъари Хив райондин ЦIийи Фрюгъярин гъулаъ райондин глава Ярмет Ярметовдин призар бадали дзюдойиан вуйи ачухъ турнир кIули гъубшну. Талитар Урусатдиъ мялум дапIнайи Халкьарин сабвалин йисан лишниккди гъухдар вуйи.
– Жигьиларин арайиъ гъи спортди мюгькам йишв дибисна. Шаксуз, диди инсандин хасиятра лигим апIура. Гъит му талитари ихь районарин жямяаьтлугъдин арайиъ айи чвевалин аьлакьйир хъанара мюгькам апIри, – гъапну, турнир ачмиш апIури, Хив райондин глава Ярмет Ярметовди.
Талитариъ Хив, СтIал Сулейман ва Мягьярамкент районариан 60-рилан зиина спортсменар иштирак гъахьнийи. Гьарсаб гъагънан категорияйин гъалибчйир тялукь дережайин грамотйириинди, медалариинди ва пулин пешкешариинди лишанлу гъапIну.
