Умгьанат Сулейманова

 
Фициб аьхю гьяракатниинди вахтра, ухьура дигиш шуладаринхьа! Ухьлан юкьуб тереф илтIибкIнайи гьякьикьатра дигиш шула. Ватан, абайин хал, абйир-бабар, бицIидар, дустар, сабпи мюгьюббат, бицIивахтнаан вуйи беневш кюкдин ниъ, ригъ ва мархьлин кьяляхъ дерккучIимир гьудубчIвуб, рабгру гъулан жакьвлин мяъли ва кьиблаз тIирхурайи дурнийирин цIар… Гьарсар инсандин кIваз хуш вуйи гьаму сиягьнаъ фу гьубкIрадайкIан? Гьелбетда, дидиъ увуз ккуни мектеб, мюгькам аьгъювалар ва тербия туву мялимар гьуркIрадар. Чпин кьисматнаъ мектебди ва мялимди фицдар-вуш себебариан аьхю роль уйнамиш дарапIу инсанарра ашул. Хъа аьхюбсиб пайназ дици дар. Учу, Бургьанкент гъулан мектеьлиъ урхури гъахьи баяр-шубар, гьадму аьхюну пайнакан вуча. Ич уьмриъ гъулан мектебдиз ва урхурайидариз гьацI аьсиртIан артухъ вахт бахш гъапIу гьацдар ужудар мялимар гъахьнийич.

Аьхюну пай думу мялимар гъи Аллагьдин рягьматдиз гъушну, гьадрарикан сар вуйи математикайин мялим Гьяжимягьямадов Гьяжимягьямад улихьнаси 86 йис яшнаъди кечмиш гъахьну. Думу хабар кубкIу вахтна дугъахъди ич уьмриан фу-вуш асасуб гъябгъювалин гъавриъ гъахьунчу. Дупну ккундуки, Гьяжимягьямад Гьяжимягьямадов заан устадвал айи пишекар математик, чан пише мялимвалихьна, тербиячивалихьна ва насигьятчивалихьна, чаз маважиб туврайи ляхнихьнаси ваъ, хъа кIваантIан вуйи рюгьнан тIалабнахьнаси янашмиш шуйи. Гьар йигъан, гьар сяаьтна урхбан гьяракатнахьна думу, вахт, сагъвал ва рюгьнан кьувватар гьяйиф дарапIди, яратмиш’валиинди янашмиш шуйи. Ва учуз, дугъахь урхурайидаризра, гьаци вуйиб рябкъюйчуз, гьаци гьисс апIуйча.

 
Гъи думу мялим ухьухъди хъимдруган, дугъу ккадапIу читин, маракьлу ва лайикьлу уьмрин рякъкан газатдин машариан ктибтуз ккундузуз. Гъит дугъхъан мялимвалин жавабдар ва баркаллу пише ктабгъуз кьаст дапIнайи баяри ва шубари нумуна гъадабгъри.
Гьяжимягьямад Мягьямадович Гьяжи-мягьямадов 1940-пи йисан Табасаран райондин Бургьанкент гъулаъ бабкан гъахьну. Аллагьдин гьюкум гьамциб гъабхьну, Гьяжимягьямаддин 6 йис тамам гъабхьиган, дугъан адаш Мягьямад кечмиш шулу. Хулаъ юкьур бицIир айи Серья халайин гьюнариин хизан уьбхбан вазифа алабхънийи. Дугъан юкьрид бицIидарра – 2 чи ва 2 чве – хулан мяишат гъабхурайи дадайин дугъри кюмекчйир гъахьи. Гьаддиз Гьяжимягьямад Гьяжимягьямадов хулаъра, мектебдиъра саб тикикьан темпелвал кадарди, зегьмет зигуз ккунди аьхю гъахьну. Дугъан бицIидихъанмина мялим хьуз кьаст ади гъабхьнийи. Кьялан мектеб ккудубкIу жигьил Ростовский пединститутдин физикайинна технологияйин факультетдик урхуз кучIвну.
1967-пи йисан институт ккудубкIну, жигьил пишекар, аьдат вуйиганси, направлениейиинди Избербаш шагьрин мектебдиз мяълимди гьаъну. Сад йисан душваъ дилихну, багъри Бургьанкент гъулан кьялан мектебдиз гъафну. Садпи йисари мугъу кьялан классариз физика ва математика кивуз хъюгъну.

 
Гьяжимягьямад Гьяжимягьямадовдин уьмрин аьхюбсиб пай мялимвал апIури гъубшну 52-йискьан вахтна думу директорин урхбан ва тербияламиш апIбан ляхин гъабхурайи заместителди гъилихну. Гьяжимягьямад мялимдихь гъурхдарин арайиъ духтрар, мялимар, инженерар, экономистар а. Ва варитIан асасуб, дурар ужудар инсанар гъахьну. Чав киврайи дарс ва бицIидар ккунивал Гьяжимягьямад мялимди гьаци дубхьну ккуни ляхинси гьисаб апIуйи. Дарсарихьна думу дериндиан гьязур шуйи, кьяляхъ гъузру бицIидарихъди читин темйириан консультацйир, факультатив дарсар гъахуйи.
Гьяжимягьямад Гьяжимягьямадов гъулаъ ва райондиъ аьхю гьюрмат айи инсан вуйи. Му касди чан уьмур бицIидариз, дурарин тербия мюгькам апIбаз, ужуб гележег ккабалгбаз бахш гъапIну. Думу сабпи категорияйин мялим вуйи. 2020-пи йисан Гьяжимягьямад мялим лайикьлу пенсияйиз удучIвуру.

 
Йиз макьалайин игит аьхю ва албагу хизандин кIулра вуйи. Дугъаз чан хпир Декабринайихъди йирхьур велед - 3 бай ва 3 риш а. Абйир-бабари варидариз заан образование тувну, гъи дурар, уьлкейин жюрбежюр йишвариъ лихура. Аьхюну риш Зумрият Дербент шагьриъ бицIидарин духтирди, Мадина ва Наида Дербентдиъ мялимарди лихура, Муслим ва Назлим предпринимателар ву. Хъа Максим Дагъустандин Огни шагьрин кьялан больницайин кIулин духтирди лихура. Дидиз улихьна думу 24 йисан военный госпиталариъ эскрарин сагъламвал уьбхбан цирклиъ хирургди гъилихну, гьадму гьисабнаан Моздок шагьриъ ерлемиш дубхьнайи 1602-пи нумрайин военный госпиталин начальникдира. Максим Гьяжимямадов гьацира Кафари Осетия-Алания Республикайин лайикьлу духтир ву. Гъи Гьяжимягьямаддин ва Декабринайин гъи 22 худул а.
Ич мялим Гьяжимягьямад Гьяжимягьямадовдикан аку вуйи хиялар гьаммишан юкIвариъ уьрхидича.