Умгьанат Сулейманова

Декабрин 4-пи йигълан 8-пи йигъаз Москвайиъ Варихалкьарин «Ухьу сатIиди вухьа» кIуру форум гъабхьну. Душваъ вари дюн’яйиан жямяаьтлугъ тешкилатарин вакилар, жигьилар, волонтерар иштирак гъахьну. Форумдин дахилнаъди дискуссйир, мастер-классар, жюрбежюр проектарин презентацийир кIули гъушну.

 

Форумдин аьхиримжи йигъан гъалибчйир ва пешкешнан йишвариз лайикьлу гъахьидар лишанлу апIбан серенжем гъабхьнийи. Узу гъи аьхю дамагъниинди «Миллетдин сагъвал» кIуру номинацияйиъ Табасаран райондин ТIаттил мектеб ккудубкIну, гьамусяаьт му Дагъустандин гьюкуматдин медицинский университетдин 4-пи курснаъ урхурайи студент риш Камила Эскендеровайи 3-пи йишв гъадабгъуваликан ва думу премияйин лауреат гъахьиваликан газат урхурайидариз хабар тувраза. Дугъу, му номинацияйиъ «Жигьил кюмекчи» кIуру проект гъюбхну. Проектдин метлеб бицIидариз медицинайин цирклиан сабпи кюмек тувуз улупуб ву. Хъа му жямяаьтлугъ сагъламвалин цирклиъ варитIан важиблу терефарикан саб вуди гьисаб шула.

«Табасарандин нурар» газатдин коллективди Камила лап кIваан тебрик апIури, гележегдиъ дугъаз хъана заан хъуркьувалар хьуб ккун апIура. Дугъан проект аргъаж шулайи наслиз ужуб нумуна шул кIури, умуд киврача.