Наргиз Гюлечова
Каспийск шагьрин «Анжи АРЕНА» стадиондин аьтрафариин 23-25-майди XXIV Вариурусатдин жинснан чарвйирин ва цIигьарин выставка кIули гъубшну. Выставкайиъ Урусатдин 24 региондиан ва Беларусь Республикайиан жинснан чарвйир артмиш апIурайи 70 мяишар иштирак гъахьну, дурари Каспийскдиъ 30-тIан артухъ жинсарин 425 марччар ва цIигьар хьади гъафну. Гьаму йигъарин арайиъ мина гьяйванатариз тамаши апIуз кIури, республикайин муниципалитетариан 20 агъзуртIан артухъ агьалйир гъафнийи. Выстакайиъ марччар-цIигьарилан гъайри, инсанариз улупуз кIури, ахалтеки жинснан гьяйвнар, гамшар, девйир, дажар ва йиккун жинснан бугъа йицарра духнайи. Асас вуди мурариз лап аьшкьниинди тамаши апIурайидар бицIидар вуйи.
Выставкайиз духнайи жинснан марччари ва цIигьари инсанар гьяйран апIуйи. Мисал вуди гъадабгъиш, Мягьячгъала шагьрин «Азамат» кIуру цIигьарин мяишатди аьжайибнан, никк ккудубзру, лап ярхи ибар кайи цIигьар духнайи. Хъа Ставрополь крайдин Георгиевский райондин Незлобная станицайиан вуйи «Георгиевский дорпер» ООО мяишатди, рижв хъадру кIару ва лизи кIулар али, силарихъна гъушу марччарра (кьюбпи шиклиъ) духнайи. Мяишатдин директор Сергей Катринецди «Табасарандин нурар» газатдиз туву мялуматариинди, дурарин мяишат сачра, ццира Дагъустандиз выставкайиъ иштирак хьуз гъафну.
«Ццийин выставкайи тамаши апIуз гъюрайи агьалйирин кьадар лап гизаф ву. ВыставкайикантIан, инсанариз, гьаруриз жаради, марччарикан ктибтбаан гизаф эргру. Сачра Дагъустандиз выставкайиз гъафиган, хайлин мяишатарихъди сатIиди ляхин апIуз кIури, йикьрарра гъийитIнийча. Гъи, магьа, Дагъустандиан вуйи мяишатарихъди дуствалин аьлакьйирра дюзмиш духьнайич.
Ич мяишатдиъ 800 кIул жинснан марччар ва гьадмукьан ччиларра а. Учу хьади дуфнайи жинсар, республикайин агьалйириз улупуз кIури, духнайидар вуйич. Мяишатдиъ 7 жинснан марччар ва 2 жинснан цIигьар артмиш апIурача. Дурарикан сабкьан ихь уьлкейин жинсар дар, дурар ухьухь цIийиди артмиш апIурайидар ву.
Хъа йиккун ерийикан улхуруш, «Дорпер» жинснан марччарин йикк, мармардашсиб, гизаф ицциб ва хюл кадру йикк ву», – ктибтнийи Сергей Катринецди.
25-пи майди шубуд йигъандин арайиъ кIули гъубшу XXIV Вариурусатдин жинснан марччарин ва цIигьарин выставкайин натижйир гъивнийи. Гьаму йигъан, выставкайин асас пай ккебгъайиз улихьна, серенжемдиз тамаши апIуз дуфнайи агьалйирин арайиъ тупут ипри, республикайин 16 мяишатдин вакилари йикьрар дапIну, 11 жинснан якъар ва 10 касдиз чарвйириз тувру алафар ва ем пай гъапIну.
Дидин кьяляхъ, натижйир йивури, XXIV Вариурусатдин жинснан чарвйир-цIигьарин выставкайиъ иштирак шулайи мяишатарин пишекрариз, марччлихънариз хайлин пешкешарра тувну. Къайд апIуб лазим вуки, Казбек райондин «Красный Октябрь» СПК жинснан малар артмиш апIру мяишатдин чарвйирихъ гъягъюрайи 12 йисандин яшнаъ айи марччлихъан Мягьямед Гьяйбулаевдиз, учв яшарин бицIир вушра, ужуди чаин али ляхин тамам апIурайивализ лигну, Урусатдин марччлихънарин милли союздихьан Гьюрматнан грамота тувну.
Мидланра гъайри, имбуну регионар ктарди, Дагъустандин чарвйирин мяишатариз, ултIубкъу хьайин гъагъишназ, дидин ерийиз ва гьацира чарвайиан гъюрайин йиккун гъагъишназ, йиккун ерийиз лигну, чпи ужуди улупу мяишатариз 44 жюрбежюр дережйирин медалар тувну. Гьадрарикан 21 медаль сабпи дережайин, 19 медаль 2-пи дережайин ва 4 медаль 3-пи дережайиндар вуйи. Хъа выставкайин – асас пешкеш – цIийи «Нива» машин «Согратль» СХК агрофирмайиз тувну. Къайд апIуб лазим вуки, кьюд йис улихьнара му мяишат Минеральные Воды шагьриъ кIули гъубшу выставкайиъ гъалиб дубхьну, пешкешди машин гъадабгънайи мяишат ву.
«Согратль» мяишатдин кIулиъ айи Аьбдурягьман Чураевди (шиклиъ) чан терефнааан выставкайин тешкилатчйириз, чпин мяишатди гъабхурайи ляхниз заан кьимат тувбаз лигну, чухсагъул мялум гъапIну.
«Думу сар йиз ваъ, хъа вари ич мяишатдиъ йисариинди лихурайи малдухтрарин, зоотехникарин, хюнйир ккудурзурайидарин ва имбуну вари коллективдин гьунар ву. Дураризра варидариз чухсагъул кIураза», – гъапну «Согратль» агрофирмайин директори.
XXIV Вариурусатдин жинснан чарвйир ва цIигьарин выставка аьхирихъна гъюбан серенжемдиъ иштирак шулайи Дагъустандин правительствойин председателин заместитель Нариман АьбдулмутIалибовди чан терефнааан выставкайин вари иштиракчйириз чухсагъул гъапну ва гъюру йисан юбилейный XXV выставкара Дагъустандиъ тешкил апIруваликан мялумат тувну.
