Умгьанат Сулейманова

Аллагьди дишагьлийиз гъюдли гафниинди, чаз хас вуйи назук манишниинди дахаргнайир, иццурайир, юкIв дарвалиъ айир сагъ апIру кьувват тувна. Гьаддиз, дадайи кIуллан хил алдатган, веледдин вари иццрушнар, дердер кIваълан гъягъюру. Хъа духтрин пише гъадабгъну, му чаз табиаьтди туву кьувват адабшвру дишагьлийир кьюбди духтрар ву. Венера Уьсманова гафнииндира, хил’индира сагъ апIру гьацдар пишекрарикан ву. Табасаран райондин Ярса гъулаъ земский духтирди лихури, дугъан 4-пи йис шула. Гьар гьяфтайи саб ражари думу Дербент шагьриъ дуланмиш шулайи чан хизандиин улукьури шулу.

 

Уьсманова Венера Аьбдурашидовна 1977-пи йисан Хив райондиъ Гъвандикк гъулаъ духтрин хизандиъ бабкан гъахьну. 1994-пи йисан Гъвандккарин кьялан мектеб заан аьгъювалариинди ккудубкIу Венера Астрахань шагьрин медицинайин академийик урхуз кучIвру. 2000-пи йисан дугъу Астрахань шагьриъ Ахшарумовский бицIидар хру хулаъ интернатура давам апIуру. Интернатура ккудубкIну гъафир 2003-2006-пи йисари Хив райондин ЦРБ-йиъ лихуру.

Венера Уьсманова 2006-пи йисланмина хайлин вахтна Чечен республикайиъ Шали шагьриъ артиллерияйин полкнаъ военный духтирди гъилихну. Гьадлин гъафир, Ярсаъ земский духтирди лихура ва аьлава вуди Дербентдиъ «Панацея» кIуру хусуси клиникайиъ ляхин апIуз хъюгъна.

21 йисан тажруба айи, сабпи категорияйин пишекар Венера Уьсманова гьамусяаьт Табасаран райондин Ярсаъ гъулаъ улихь хьайи сяняаьткар ву. Чав наан ляхин апIури гъахьишра, Венерайин зегьметназ инсанари анжагъ ужуб кьимат тувра.

Гъуллугънаъ дугъаз хъана аьхю хъуркьувалар ишри.