Наргиз Гюлечова
23-пи майдиан 25-пи майдизкьан Каспийск шагьриъ ерлешмиш дубхьнайи «Анжи Арена» стадиондин аьтрафариин нубатнан ражари Вариурусатдин жинснан марччаринна цIигьарин XXIV выставка кIули гъябгъиди.
Дагъустан Республикайин гъулан мяишатдин ва ипIру-убхъру сурсатарин министерствойин пресс-гъуллугънан кIулиъ айи Мягьямед Аьбдуллаевди туву мялуматариинди, выставкайиъ иштирак хьуз пландиъ ади аьрза туврайи жинснан малар уьрхюрайи мяишатарин кьадар гьар йигъан цIийи алапIури ими.
15-пи майдиз вуйи мялуматариинди, му яркьу вуйи серенжемдиъ иштирак хьуз Урусатдин 10 региондиан жинснан марччар ва цIигьар артмиш апIурайи 66 мяишатди аьрзйир тувна. Мурар ктарди, Урусатдин 15 регионди ва Беларусь Республикайин мяишатарира выставкайиъ иштирак хьуз ккайиваликан мялум дапIна.
Серенжемдиз Совет Федерацияйиан, Урусатдин гъулан мяишатдин ва промышленностдин министерствйириан ва гьацира регионариан гьюрматлу хяларра гъюз кка. Выставкайин дахилнаъди чарвйирин йиккун сурсат артухъ апIбан, чарвайин заан ерийин йикк, жвуван региондинси, жара регионаринра базрариъ масу тувбан ва гьацира хьа гьясил ва хьайикан вуйи шей’ар гьязур апIбан месэлйириз бахш вуйи илминна таржубайин конференцйир, гергми столар кIули гъахуз планариъ а.
«Пуз ккундузузки, ккудубшу йисанси дарди, цци выставкайиъ иштирак шлу регионарин кьадар гизаф хьуб мумкин ву. Выставкайин дахилнаъди, марччаризна цIигьаризси, гьяйвнариз, гамшариз, дажйириз ва гьацира девйириз тамаши апIуз мумкинвал хьибди.
Мидланра гъайри, му выставкайиъ малдарвалин цирклиъ ишлетмиш апIурайи цIийиваларра улупиди. Гьадму гьисабнаъди, мал-къарайиз тувру мянфяаьтлу дапIнайи ипIруб, ветеринарияйиъ ишлетмиш апIурайи дармнар, хьа тартиб апIру цIийи алатар ва гьацира жара шей’ар. Гьаддихъди сабси, уч духьнайидариз марччлин хьа ултIубкъбан мастер-классра улупиди.
Мидланра гъайри, выставка кIули гъябгъюрайи йигъари, ихь республикара кади, 4 регионди чпин майднарра гьязур апIуз планариъ а. Регионарин майднар гьязур апIбан асас метлеб, выставкайиъ иштирак шлу касар, гьадму регионарин культурайихъди ва аьдатарихъди таниш апIуб ву», – гъапну сюгьбатчийи.
Мягьямед Аьбдуллаевди аьлава гъапIганси, Дагъустандин правительствойин табшуругъниинди, республикайин министерствйирра серенжемдин тешкиллувалин ляхнариъ иштирак хьпанди ву. Выставкайин дахилнаъди Дагъустандин туризмдинна халкьдин сяняаьткарвалин министерствойи республикайин халкьарин сяняаьткарвалин шей’ар улупуз планламиш дапIна. Республикайин культурайин, гъулан мяишатдин ва ипIру–убхъру сурсатарин министерствйири жинснан чарвйир артмиш апIурайи муниципалитетарихъди сатIиди Дагъустандин халкьарин майднар тешкил апIиди. Хъа региондин промышленностдин министерствойи кIуруш, хьайихъди аьлакьалу вуйи месэлйириз лигру рабочий дестейин заседаниейин тешкиллувал, гъулан мяишатдиъ, хъа асас вуди малдарвалин цирклиъ лазим шлу алатарин выставка тешкил апIуб, дуркьаригъ халачи убхбан мастер-класс ва хьайикан апIурайи шей’ар улупуб чаина гъадабгъна.
Къайд дапIну ккунду, выставкайиъ иштирак хьуз ва гьяйванатариз лигуз ккунидариз варидиз, дина дуфну тамаши апIуз мумкинвал а.
