Зубайдат Шябанова

4-пи сентбяри Табасаран райондин ФуркIил ва Имшнигъ гъуларин мектебариъ «Образование» милли проектдин дахилнаъ айи «Деврин мектеб» федералин проект юрутмиш апIури, образованиейин «Точка роста» центрар арццну.

 

Серенжемариъ жара гъуларин мектебарин мялимар ва урхурайидар иштирак гъахьнийи. Дурариз кьюбиб мектебарин «Точка роста» центрин мялимари экскурсйир гъухну.

«Точка роста» физикайин, химияйин, биологияйин кабинетариз цIийи, гьаму деврин алатар ва авадлугъар айи образованиейин майдан ву. Тажрубалу мялимарин хиликк мектебдиъ урхурайидарихьан ахтармиш апIбан ляхнариин машгъул хьуз, опытар гъахуз, чпин хусуси проектар ктагъуз ва тартиб апIуз гъулай дубхьна. Хъа гележегдиъ выпускникариз имтигьнарин практикайин пайнахьна рягьятди гьязур хьуз мумкинвал шула.

Табасаран райондин глава Мягьямед Къурбановди образованиейин артмиш’валиъ думу центрарин важиблувал швнуб-сабан къайд гъапIну.

«Гъийин йигъан райондиъ «Точка роста» центрар 43 а. Дурарикан 6 центр цифровой ва гуманитарный цирклиан, хъа имбу 37 илминна технологйирин цирклиан ву. Думу центрариъ айи деврин шараитариз дилигну, ихь баяр-шубар конкурентвализ удучIвуз удукьрудар, зигьимлудар шула. Ихь урхурайидариз гележегдиъра шагьрарин мектебариъстар шараитар арайиз хуз вари мумкинвалар агидихьа», – гъапнийи муниципалитетдин кIулиъ айири.