Ватандин Аьхю дявдин вахтна ихь уьлкейин эскрар фициб ватанпересвалиинди дявдиъ иштирак хьуз гъягъюри гъахьнуш, цци коронавирусдин уьзрихъди вуйи женгнаъ ихь духтрарра гьациб фидакарвалиинди иштирак шула. 2019-пи йисан Китайиъ уьзур абхънайи вахтна, мициб аьгьвалат ихь гьюкуматдиз, хъа асас вуди ихь республикайиз шул кIури, хиял дайи. Гьяйифки, Дагъустандиъ уьзур лап гъагъиди тарабгъну.
Гъи узуз улихьна йигъари къайд гъапIу медицинайин пишекрарин Йигъахъди аьлакьалу вуди, коронавирус уьзрихъди женгнаъ гъахьи, Каспийск шагьрин ЦГБ-йин терапияйин отделениейиъ лихурайи духтир, ихь ватанагьли Наима Наврузбеговайикан бикIуз ккундузуз.
Наима Набрузбеговайи думу отделенийиъ 1999-пи йисхъан мина терапевт духтирди ляхин апIура.
«Республикайин вари больницйирси, ич больницара коронавирусдин уьзур кайидар кьабул апIру госпиталси гьязур гъапIнийи. Гьамусяаьт му гафар сарун рягьятдарси ерхьуру. Думуган дици пузра кIваз гъагъи шуйи. Больницайиъ шубуб вазлин арайиъ гьадму уьзур кайидар сагъ апIури, уьзрихъди женгнаъ гъахьунча. Му вахтнан арайиъ фукьан вушра читин гьялнаъ айи аьзарлуйирра гъяркъюнчуз. Ич уларикк, уьзриан сагъ апIуз дархьиди, кечмиш гъахьидарра гъахьну. Гьацдар касар рякъюри, сад йигъкьан диришру йигъ гъабхьундарич. Гъагъи уьзур кайидар гьар йигъан уларикк рякъювали кIваз лап яман тясир апIуйи. Аьзарлуйирихъди лихурайидариз варидиз гьар йигъан психологарин кюмекра лазим шуйи.
Отделениейиъ аьзарлуйирихъди ляхин апIурайи духтрар гьуркIну ашра, медсестрйир гьуркIри гъахьундарчуз. Учухъди лихурайи медсестрйириз лапра гъагъиди алабхъну. Дурари суткйириинди уьру зонайиъ ляхин апIури гъахьну. Душв’ан удучIвган, дурар дурцну, ликрилан алдахъури шуйи. Амма гьич сарира, гъагъиди вучуз кIури, аьрзйир апIури гъахьундар. Варидарин асас метлеб – аьзарлуйир сагъ дапIну хулаз гьаувал вуйи», – кIура духтри.
Наима Наврузбеговайин гафариинди, гьамкьан йисари больницайиъ ляхин апIури, гьеле дурариз мициб гъагъи уьзур алабхъундар.
«Хъа гьамусяаьт айи аьгьвалатнакан улхуруш, гъийин йигъаз отделениейиъ коронавирус уьзур кубчIву вари аьзарлуйир сагъ дапIну, хулариз гьаъна. Больницайин терапияйин отделение 1-пи июлизкьан карантиндиин дебккна, хъа му уьзур кайи касар гьелелиг инфекцйир кайи отделениейиз кьабул апIури ами», – аьлава гъапIну Наима Наврузбеговайи.
