Агъзрариинди духтрари ва медсестрйири аьхиримжи вазари чпин пишекарвалин дережа, кадабгънайи ляхниз вафалувал дибдиан ачухъ гъапIну. Дурарин игитвалра саб вахтнара дархьиси мялум гъабхьну. Жавабдарвалиинди йишвариин гъубху ляхни натижйирра тувну: вари уьлке сикинсуз гъапIу коронавирус уьзур кьяляхъ йивуз хъюгъну.
Хив ЦРБ-йин терапевт духтир Майтаб Исрафилова, дугъриданна, игит ччвурназ лайикь ву. Фицики дугъу саб гучI’валра адарди кьюб ражари (гьар ражари кьюб гьяфтайин муддатнаъ) уьру зонайиъ баркаллуди зегьмет гъизигну.
Майтаб Исрафилова (Гьямзатова) 1975-пи йисан СтIал Сулейман райондин «Герейхановдин совхоз» ччвур али гъулаъ бабкан гъахьну. Багъри гъулан уьмуми мектеб ккудубкIну, думу 1992-пи йисан ДГМА-йик урхуз кучIвру. Ужудар аьгъювалариинди улупнайи академия ккудубкIу жигьил духтри 1998-1999-пи йисари РЦИБ-диъ интернатурара давам гъапIну. Гьадму йисан Майтаб Аьбдулгьялимова Шихикент гъулан сагъламвалин амбулаторияйин заведующийди тяйин гъапIну. Улупнайи гъуллугъниин дугъу саки 2019-пи йисазкьан зегьмет гъизигну. Хъа 2019-пи йисан октябрин эвелариан «Земский духтир» программайин дахилнаъди Хив ЦРБ-йиз терапевтди гъафну.
Майтаб Исрафилова коронавирус уьзриз аькси женгназ удучIву духтрарин сабпи дестейин дахилнаъди агьалйириз кюмекназ гъафну. Уьру зонайиъ зегьмет зигбаз улупнайи муддат ккудубкIиган, аьдат вуйиси, духтри 14 йигъан эрг’вал гъивну. Кьяляхъна, хулаъ яшар бегьем дархьи бицIидар айивализра дилигди, аьгьвалатнан гъагъивалин гъавриъ духьну дугъу нубатнан ражари аьзарлуйириз кюмекнан хил гьачIабккну. Дугъаз гьам аьзарлуйири, гьамсана больницайин руководствойи чухсагъул мялум апIура.
