Июлин 2-пи йигъан Дагъустандин Глава Владимир Васильевди РД-йин сечкйирин комиссияйин председатель Мягьямед Дибировдихъди гюрюш кIули гъубхну. Думу гюрюшдиъ республикайин избиркомдин кIулиъ айири региондиъ РФ-дин Конституцияйиъ дигиш’валар тIаъбан гьякьнаан сесер тувувалин натижйирикан мялуматар тувну.
«Июлин садпи йигъан РФ-дин Конституцияйиъ дигиш’валар тIаъбан гьякьнаан разивалин сесер тувбан ляхин ккудубкIнийи. Республикайин ярхлаъ ерлешмиш духьнайи районариъ айи 106 участокдиъ сесер вахтназ улихьна тувну, июндин 21-пи йигъаз ккудукIнийи, июндин 28-пи йигъан Чечень островдиъ сесер тувну. Июлин садпи йигъ улубкьайиз сесер тувру участокариз гьар йигъан 10 процентдиинакьан агьалйир гъюри, 30-пи июндиз 72 процент агьалйири чпин ватандаш буржи тамам гъапIнийи. Хъа июлин садпи йигъан сесер тувну ккудубкIбан кьяляхъ гъуху гьисабариинди, Дагъустандин 89,99 процент агьалйир сесер тувуз гъафнийи. Конституцияйиъ дигиш’валар тIауз рази вуйидарин кьадар – 1352732 кас, хъа аькси вуйидарин кьадар – 155290 кас гъахьну», – къайд гъапIну Мягьямед Дибировди.
Дугъу гъапиганси, сесер тувувалин ляхин, Роспотребнадзорин тIалабариз асас вуди, сесер тувру участокариъ инсанарин сагъламвализ зарар даршлуси гъубхнийи: марццишнан хатIасузвал уьбхюри, инсанарин арайиъ лазим вуйи кьадар манзил ади сесер туври гъухьну.
Дагъустандин Главайи, гъизгъин къайдайиъди ляхин апIувал алабхъбаз дилигну, сечкйирин комиссияйин вари членариз чухсагъул мялум гъапIну: «Ихь ватандашаризра сесер тувбаз – му терефназра, тмуну терефназра – чухсагъул. «Ав» гъапидари ухьу дюз рякъюъ айивал субут апIура. Ихь Президентди гъабхурайи политика сифтена-сифте инсандин маракьар уьрхюз, регионар чпин улихь дийигънайи учIру месэлйир гьял апIбаъ сабна сабди гъуд-рузуз диш дапIнайиб ву. Конституцияйиъ дигиш’валар тIаъбаз аькси вуйи ватандашарра ихь ляхниина жалб апIидихьа. Жямяаьтлугъдиз, сесер тувру участокариъ гюзчивал гъабхури гъахьидариз, политикайин партйириз варидариз чухсагъул мялум апIуз ккундузуз», – гъапну Владимир Васильевди.
Региондин кIулиъ айири гюзчивал гъабхрударин дестейиканра гьерхнийи. Мягьямед Дибировди гъапиганси, Дагъустандиъ гюзчивал гъабхру 9 агъзур касдиз документар тувнийи, гьадрарикан гьар йигъан 4 агъзуриинакьан касари сесер тувру участокариин гюзчивал гъабхури гъахьну.
«Ухьу ихь ватандашарин ихтиярар уьрхбан, образованиейин, сагъламвал уьбх-бан циркларин ва гьацира гизаф жара месэлйир гьял дапIну ккунду. Ихь агьалйири гьаддик умуд кади чпин сесер тувну. Агьалйирин яшайишдин дережа за апIбан бинайиъ бизнесдин артмиш’вал, агьалйирин гъуллугъар гьуркIбахьинди илтIибкIнайи республикайин бюджет арайиз хувал дийибгъна. Гьюкми чан кIул’ина гъадагъу мажбурнамйир тамам апIурайивал ватандашариз рябкъюра, гьаддиз дурар сесер тувуз гъафну», – къайд гъапIну Дагъустандин Главайи.
Табасаран райондиъра РФ-дин Конституцияйиъ дигиш’валар тIаъбан гьякьнаан сесер тувбан ляхин саб жюрейин къайдасузвалар адарди кIули гъубшну. Табасаран райондиъ сесер тувбахъан жавабдарвал гъубху РД-йин юстицияйин министр Къазимягьямед Сефикъурбановди ва РД-йин НС-дин депутат Алавудин Мирзабалаевди къайд гъапIганси, Табасаран райондиъ 91,5% агьалйири сесер тувну.
Хив райондиз сесер тувбахъди гюзчивал гъабхуз РД-йин Главайин ва правительствойин администрацияйин кIулиъ айирин заместитель Нюсрет Уьмаров ва РД-йин НС-йин депутат Нариман Асваров гъушнийи. Хив райондин 95% агьалйир сесер тувбаъ иштирак гъахьну. Думу кьадарнакан 94,5% Конституцияйиъ дигиш’валар тувбаз разивал тувну, 4,5% агьалйири чпин наразивал улупну.
