Дагъустандин Огни шагьриъ 200 бицIириз йишв айи бицIидарин багъ тикмиш апIбан ляхнар ккергъна. Шагьрин главайин вазифйир тамам апIурайи Жалалудин Аьлирзаевди къайд гъапIганси, тикилишчивалин ляхнар «Демография» милли проектдин дахилнаъди РФ-дин оборонайин Министерствойин 4-пи нумрайин военный гъуллугънанна тикилишчивалин КIулин управлениейи тамам апIура. ЦIийи багъ гъябгъюрайи йисандин аьхириз дивну ккудубкIуз планламиш дапIна.

 

Шагьрин кIулиъ айири гъапиганси, бицIидарин багъ диврайи йишв гьавайиди кадабгънайиб дар. Муганайиз му райондиъ мектебдиз улихьна вуйи бицIидарин сабкьан идара адайи. Дарамат деврин тIалабариз жаваб тувру, уткан, вари шартIар айи, тамшир апIру ва спортдиин машгъул шлу йишвар ккабалгнайи, мектебдиз улихьна вуйи жюрбежюр яшарин бицIидариз вуйи багъ хьибди.

Шагьриъ цIийи багъдиз 1500-тIан артухъ бицIидар ккилигура. Тикилишчивалин ляхнар гьяракатниинди гъягъюра. Сифте шагьрин кIулиъ айидариз федералин «Образование» проект уьмрин гьяракатнаъ ипуз жилин йишв бихъури гъабхьундар. Гьадди тикилишчивалин ляхнар вахтниинди ккергъуз манигъ’вал гъапIнийи. Гьамусяаьт тикилишчйири цIийи багъ тикмиш апIбан ляхнар улупнайи вахтназ ккудукIуз гаф тувра.