Гьаму йигъари Табасаран райондин администрацияйин актовый залиъ райондин глава Мягьямед Къурбановдин ччвурнахъан вуйи стипендйир тяйин апIбан, заан аьгъюваларииинди мектеб ккудубкIу выпускникариз гъизилин медалар, хъа ГТО-йиъ иштирак духьну, кIубанвал улупдариз тялукь лишнар тувбан серенжем кIули гъубшну.
Серенжемдиъ райондин глава Мягьямед Къурбанов, Табасаран райондин депутатарин Собраниейин председатель Аьлимягьямед Къазиев, гизаф гъуллугъар гьуркIру жигьиларин Центрин директор Рамис Рамазанов, Табасаран райондин образованиейин управлениейин начальник Аьбдусалам Гьясанов, мектебарин директорар ва выпускникарин абйир-бабар иштирак гъахьнийи.
Райондин мяна айи серенжемдиз главайин ччвурнахъан вуйи стипендияйиз лайикьлу гъахьи Мягьрягъарин 1-пи нумрайин кьялан мектебдиъ урхурайи Айгюн Бабахановайиз, Хючнаарин 2-пи нумрайин кьялан мектебдиъ урхурайи Калимат Гьяжиевайийиз ва «Юлдаш» ЦО-йиъ урхурайи Милена Султановайиз дих дапIнайи. Мидланра гъайри, серенжемдиъ вари райондиан медалар гъадагъу 40 выпускникар ва 15 кас ГТО-йин гъалибчйир иштирак гъахьнийи.
Актовый залиъ уч духьнайидарихьинди илтIикIну, Мягьямед Къурбановди выпускникар мектеб ккудубкIбахъди тебрик гъапIнийи.
«Гъи му серенжем гьамци бицIиди гъабхбан асас себеб – коронавирусдихъди вуйи аьгьвалат кьяляхъ дубшну адрувал ву. Ихь райондиъ гьамцдар кIубан баяр-шубар айивалиинди дамагъ апIурахьа, фицики райондин гъюзимбу гележег гьамрарин хилиъ а.
Райондин экономика арт-миш апIбан бадали, ухьуз ужудар пишекрар лазим вухьуз. Сабансан ражари текрар апIураза, райондин гележег ичв хилиъ а. ЙицIисад йисандин арайиъ мектебдиъ урхури, учву ужудар хъуркьувалар улупунчва. Заан образование гъадабгъну, ужудар пишекрар духьну, учву ихь райондиз кьяляхъ гъюр кIури, умуд кивраза»,
– гъапнийи дугъу.
Уч духьнайи выпускникар му йигъахъди тебрик дапIну, Рамис Рамазановди райондин главайин ччвурнахъан туврайи стипендияйин гьякьнаан мялуматар тувнийи. Хъасин дидин сагьибар гъахьи шубрид шубаризра чпин лайикьлу пешкеш райондин главайи ва райсобраниейин председатели тувнийи.
Серенжемдин аьхириъ Аьбдусалам Гьясановди вари выпускникар ужудар хъуркьувалариинди мектеб ккудубкIбахъди тебрик гъапIну ва дурариз чпин ккебгърайи цIийи уьмриъ хъанара заан хъуркьувалар ккун гъапIну.
