РД-йин сагъламвал уьбхбан Министерствойиан учуз туву мялуматариинди, Республикайин ифи тувру станцияйиъ ифдин вари группйирин ва вари резусарин учIру кьитвал арайиз дуфна. Гьаддихъди аьлакьалу вуди ифи тувру станцияйин гъуллугъчйири республикайин агьалйириз донорар хьуз теклиф апIура.
Къайд апIуб лазим вуки, гъябгъюрайи йисан коронавирусдин тIягъвнихъди аьла-кьалу вуди ифдиз лапра артухъ игьтияж гъабхьнийи, фицики ифи тувру станция-йин вакилари апрель вазлилан мина ифи гъадабгъуз жара йишвариз гъягъювал дебккну гъахьну. Мидланра гъайри, гьаммишан ифи тувру касарин жягьтлувалра ис гъабхьнийи. Гизафдариз медицинайин идарйириъ, гизаф агьалйир уч шлу йишварихь, жямяаьтлугъ транспортдиъ чпик коронавирус кубчIврувалихьан гучIури гъахьнийи. Хъа уьмур коронавирусдиин дийибгънадар, больницйириъ операцйир апIура, ифи чарасуз лазим ву.
Республикайин ифи тувру станцияйи донорар кьабул апIувалин ляхин гужалди жанлу дапIна. Думу станция Мягьячгъала шагьриъ Д. Атаевдин ччвурнахъ хъайи кючейиъ 3-пи нумрайин дараматариъ ерлешмиш дубхьна. Жара касариз кюмек апIуз ният ади жвуван хушниинди ифи тувуз гъафи касар маважиб хътадабтIди кьюд лихру йигъхьан азад апIуру, гьар ражари туву ифдихъан 510 манатра тувру. Мидланра гъайри, Республикайин ифи тувру станцияйиъ гьисабназ гъадагънайи донорарихьан пулсузди чпик коронавирус каш ахтармиш апIру анализарра тувуз шулу.
