Ухьу фунуб гьюкумат, регион, республика гъадабгъишра, душв яшайишдинна экономикайин терефнаан артмиш апIбаъ асас роль уйнамиш апIурайидар жигьилар ву.
Улихьди, яна совет деврин йисари, гьюкуматди жигьилариз фикирра тувуйи ва дурар зурба проектар уьмриз кечирмиш апIузра жалб апIуйи. Гъи ихь гьюкуматдиъ му терефнаан гъабхурайи ляхин зяиф дубхьна. Гьаз гъапиш, сабпиб ва варитIан асасуб, ихь жигьилар гьаммишан ляхнихъди тямин апIбан месэла гъи ихь уьлкейиъ лап учIруди дийибгъна.
Дициб аьгьвалатну жигьиларин арайиъ сагъу уьмрин саягъназ хас дару гьяракатар тарагъувализ бина ккиврубра саризра жиниб дар. Гьадму гьисабнаан гъи жигьиларин арайиъ алкоголизм ва наркомания, жюрбежюр тахсиркарвалар яркьуди учIврайивал ва гъийин гьякьикьи уьмрин жара нукьсанвалар тасдикь апIурайи мисалар фукьан-вушра хуз шулу.
Му месэлайин гьякьнаан Дербент шагьриъ фициб аьгьвалат арайиз дуфнаш, душваъ жигьиларихъди фициб ляхин гъабхураш, узу Дербент шагьрин администрацияйиъ жигьиларин тешкилатарихъди ляхин гъабхурайи гъуллугъчи Хочбар Баркаевдихьан гьерхнийза. Дугъу узуз гьамциб жаваб тувнийи:
«Жигьилар – гъи ихь жямяаьтди апIурайи ляхник чпин активвалиинди варитIан аьхю пай кивурайидар ву. Жанлуди улихь гъягъюрайи жигьиларин ляхнариз асас фикир туври, ухьу варидари сатIиди дурариз аку дуланажадилан рякъ ккивуз кюмек тувну ккунду. Гьаз гъапиш, арайиз гъюрайи наслариз гъи мицдар жигьилари апIурайи ляхнар нумуна ву. Хулан шибритI ужуб гъабхьиш, халра ужуб шулу. Гьаци вуйиган ухьу ихь гьюзимбу гележегдихъ жафа дизигну, вари жигьиларин гележег ккабалгуз чалишмиш духьну ккунду.
Эгер инсандиз чан ляхин аьгъяш, гъуллугънахьна дугъан маракьлувал, гьевес аш, зигурайи зегьметну дугъаз хуш’валтIан хурдар. Гьадму фикир дапIну, гъи ухьу ихь жигьилариз чпин ужудар проектар, фикрар уьмриъ кечирмиш апIуз мумкинвал тувну, дурар улихь гьаъну ккунду.
27-пи июндиъ Урусатдиъ жигьиларин Йигъ къайд гъапIну. Му йигъан Дербент шагьрин администрацияйин идарайан Дагъустандин Глава Владимир Васильевдин видео конференцийн къайдайиинди жигьиларихъди вуйи гюрюш кIули гъубшнийи.
Йиз фикриинди, гъи ихь жигьилари апIурайи ляхнариз мициб асас фикир тувувал гизаф ужуб ляхин гъабхьну. Гьаз гъапиш, му конференцияйи жигьиларик чпи апIурайи ляхнар кIулиз адагъуз хъанара аьхю юкIв капIну, дурари тамам апIуз ккимбу ляхнариз мумкинвалар ачухъ гъапIну. Гъи Дербентдин мэр Хизри Абакаровдира аьхю кюмек апIурачуз. Фикир тувраш, Хизри Абакаров гъафухъан мина Дербент шагьриъ кIули гъахурайи ужудар серенжемаринна ляхнарин кьадар артухъ гъабхьну, ва шагьриъ ужуб терефназди вуйи дигиш’валара гизаф духьна. Мицир кас улихь хьайивал шагьрин жигьилариз, ихь жямяаьтдиз аьхю уж’вал ву. Дугъу жигьиларин учIру месэлйир гьял апIуз чахьан шлу кюмек тувра. Учу, шагьрин жигьиларин гележег ккабалгбан бдали, учхьан шлуб вари апIурача»,
– къайд гъапIнийи дугъу.
