Октябрин 14-пи йигъан Мягьячгъалайиъ, «Урусат – йиз тарих» тарихи паркдиъ «Юнармия» кIуру вари Урусатдин дявдинна ватанпервервалин жямяаьтлугъ гьяракатнан республикайин фестиваль кIули гъубшну. Фестивалиъ жямяаьтлугъ гьяракатнан 150-риинакьан членар иштирак гъахьнийи.
Жигьил ватанперверар яшнан аьхю дустарихъди Ватандихьна вуйи ккунивал артухъ апIру кинофильмариз гъилигну, тарихи квест-тамши кIули гъубхну, гележегдиз айи планарикан ктибтну. Хъа жигьил ватанперверарин планар аьхюдар ву: жюрбежюр талитар, тарихдихьна вуйи гьюрмат уьбхювалин серенжемар гъахувал ва гьацдар жарадар. Слетдин иштиракчйириз, дурари гъадагънайи хъуркьувалариз дилигну, сертификатар тувну.
Республикайиъ уьмриз кечирмиш апIурайи жигьиларин политикайин артмиш’валикан ктибтувал ккун апIури, учу «Табасарандин нурар» газатдин редакцияйиз Дагъустан Республикайин жигьиларин ляхнариз лигру Министерствойин жигьиларин центрин жигьилариз ватандаш’валинна ватанпервервалин тербия тувбан отделин гъуллугъчи Аьлимурад Аьлибеговдиз теклиф гъапIунча.
Аьлимурад Къазимягьяме-дович Табасаран райондин ЧIвурдаф гъулан агьали ву. Дугъу Мягьячгъалайин политехнический колледж ккудубкIну, гьадушваъ урхури имиди ДГИНХ-дин бизнес-колледждиъра гъурхну. Учв студентди вуйи вахтна Аьлимурад жигьиларин политикайиин машгъул гъахьну. Республикайиъ жигьиларин политика артмиш апIбаз дилигну, гъубшу йисан Мягьячгъалайиъ жигьиларин Йигъ къайд апIбахъди аьлакьалу вуди, РД-йин образованиейин ва илимдин министр Уммупазиль Уьмаровайи дугъаз чухсагъул мялум апIбан кагъаз тувну. Дугъан жигьиларин ляхнихьна вуйи активвал гъябкъиган, жигьиларихъди ляхин гъабхру министерствойи дугъаз ляхниз теклиф гъапIну, ва гьаму йисан январихъан мина дугъу чан зегьметнан рякъ ккебгъну. Дугъахъди гъубху сюгьбат исихъ туврача.
– Аьлимурад Къазимягьямедович, уву апIурайи ляхникан жикъиди кидибт.
– Ляхниъ учIвну гизаф вахт даршра, жигьиларихъди гъабхру ляхнин гъавриъ айза, фицики узу думу ляхнихъ хъади кьюд-шубуд йис вуйиз. Гьаму вахтнан арайиъ районариъ, Мягьячгъалайиъ гизаф серенжемар гъухунча. Республикайин жигьилар, чпиз яшайишдин проектариин ляхин апIуз кюмек ккун апIури, учухьна илтIикIури шулу. Жигьиларин грантар бадали ккебгърайи конкурсдиз «Табасаран райондиан вуйи агьалйириз кюмек тувру волонтерарин корпус арайиз хувал» проект гьязур дапIназа. Эгер конкурсдиъ думу проект гъалиб гъабхьиш, Мягьячгъалайиъ думу уьмриз кечирмиш апIбанди вуза.
– Учву апIурайи ляхниз пандемияйи манигъ’вал туврайин? Читинвалариан фици удучвурачва?
– Гьелбетда, вари циркларизси, пандемияйи жигьиларихъди гъабхру ляхнизра гизаф манигъ’вал тувра. Республикайин гъирагъдиъ гъахру серенжемариъ ихь жигьиларихьан чпин мумкинвалар улупуз шуладар.
Улихьнаси «Зарница» кIуру жигьиларин дявдинна спортдин тамши кIули гъубхунча. Думу тамшийин сабпи пай республикайин районарин мектебарин арайиъ кIули гъубшнийи. Табасаран райондин Хючна гъулан команда финализ удубчIвнийи. «Зарницайин» финалиъ районариъ гъалибвал гъадабгъу командйир иштирак гъахьнийи. Сабпи йишв Хунзах райондин командайи, хъа кьюбпи йишв Табасаран райондин командайи гъадагънийи. Мицисдар серенжемариз жигьиларин ляхнариз лигру министерствойи пулин дакьатар жара апIура.
– Коронавирусдин инфекция тарбгъувалихъди аьлакьалуди карантин мялум дапIнайи вахтна жигьиларихъди кюмекнан ляхнар тешкил апIури гъахьунчва?
– Ав, жигьиларин арайиъ яшлуйириз кюмек тувбан ляхин лап яркьуди гъабхури гъахьунча. Министерствойиъ «жвуван хушлувалиинди» отделин директор Рашид Аьбдуллаевди ляхин апIура. Республикайин жигьиларин рягьимлувалин ляхин тешкил апIурайир гьадму ву. Пандемия мялум гъапIиган, Москвайиъ «Ухьу сатIиди вухьа» кIуру проект уьмриз кечирмиш апIуз хъюгъну. Регионариъра думу пректдин тереф гъюбхну. Парламентдиъ айи жигьиларин правительствора ужудар ляхнарин тешкилатчи ву. Пул уч апIури, гизафси чпин терефнаан, игьтияж айи хизанариз итIру сурсатар пай апIбаъ жигьиларин кюмек аьхюб гъабхьну.
– Ихь республикайин мектебариъ «Юнармия» гьяракатнан членар гизаф айин?
– Республикайин гизаф мектебариъ «Юнармия» гьяракатнан членар а. Дурарихъди мектебариъ физический культурайин дарсар киврайи мялимари ляхин гъабхура. Учу гъахру серенжемарин иштиракчйирин аьхюну пай мектебарин заан классариъ урхурайи баяр-шубар ву.
Аьлимурад Аьлибеговдиз гележегдиъра аргъаж шулайи наслариз ватанпервервалин тербия тувбан ляхниъ хъуркьувалар ккун апIурахьа.
