Ухьуз мялум вуйиганси, рякъяр гьаммишан рас, дурариз хъайивал апIури ккунду. Гьаци дархьиш, ухьуз, гъуларин шартIариъ яшамиш шулайидариз, гьаммишан рякъюъди гъягъбан читинвалар алахьуру. Дюз гъапиш, пулин дакьатар гьуркIну адрувал себеб вуди, рякъяр рас апIувалин ляхнар хъайи-хъайиганси кIулизра адагъуз шуладар. Думу месэлайира ихь рякъяр рас апIуз манигъ’валар тувру. Гьаци вушра, гьар йисан райондин гъулариз рякъяр цIи-цIибди рас, цIийидар тикмиш апIувалин ляхнар кIули гъахура. Дици ву-йивал рякъярихъ тамам апIурайи ляхнари субут апIура.
25-пи октябриъ узу Табасаран райондин Гискан – Цалакинди гъябгъюрайи рякъ рас апIурайи йишвахьна гъушнийза. Думу рякъ рас апIурайи йишвахь узу Гискарин жямяаьтдихъди гюрюшмиш гъахьнийза. Думу рякъюхъ ляхин апIури, Аьбдуселим Аьбдуселимов, Гьяшим Гьяшимов, Шамиль Гьяшимов, Аьбдулмалик Мягьямедов, Къурбан Селимов лихуриайи. Му рякъ, Гискарин гъулан жямяаьтдин гьарсаб хизанди чпин юкIв вуйибси пул уч дапIну, чпин кьувватариинди апIурайиб вуйи. Бульдозерихъди му рякъ рас апIури, СертIил гъулан агьали Шябан Шихсефиевди ляхин апIурайи. Гисик гъулхьан Цалакна шубуб километрин манзил а. Шубуд йигъандин арайиъ бульдозерихъди апIурайи ляхин дапIну ккудубкIну. Гьамус, ичIар айи йишвариин хяхял алабхьну, грейдерихъди дурар дюз апIувал гъубзра.
Му рякъ улихьдин вахтари лап худнаъ айи рякъ вуйи, аьхиримжи йисари ишлетмиш дарапIди дипнайи. Му рякъ цIийи алапIбаъ фу мяна аш, узу Гьяшим Агъамирзаевичдикан ктибтуб тIалаб гъапIнийза. Дугъан гафариинди, му рякъ вари йишварихъанди мянфяаьтлуб ву. Гискан Хючназ Гурихъ гъул’ан мина гъягъруган, 6 километр манзил а, гьаддиз рякъ лап ярхла шула, хъа Цалкан мина гъягъруган, гьацI рякъси шула. Гьацира заан гъулариз гъягъруганра, Хючнаан мина хъилицну гъягъругантIан лап багахь шула. «Хучнинский» совхоздин метефйир хъимиди, му рякъ багахь хьайи вари гъулари ишлетмиш апIурайиб вуйи, инсанар никк ва йикк масу гъадагъуз гъюри шуйи, гьацира мал-къарайиз алафра. Думу вахтна узу «Хучнинский» совхоздин беларусдихъ ляхин апIури гъахьнийза, гьаддиз му рякъ узуз лап танишди вуйзуз. Улихьдин вахтари гьаму метефейин исихъ, Рубас нирихъ хю рябгъру рягъинра хъайи. Магьа гьамус, метефйир дарагъну, рягъинра хъимдар, гьаддиз му рякъра дипну, ишлетмиш дарапIди гизаф вахт вуйи. Ургъурайи мархьариан ягъли архар ахьну, думу рякъ лап барбатI дапIнайи. Багахь хьайи гъулариз гурттар урччуз ва жикIуз нирихъна гъюзра лап багахь шула.
Мушвахъ лихурайидариз кюмек лазим гъабхьиган, жямяаьтдира, жигьиларира чпихьан шлу кюмекар апIуру. Дих гъапIиган, хътакурдар. Ич рякъ рас апIурайивалиин гизаф шад вуча. Му ич гележегдин наслариз гъубзрайи аьхю уьмарат ву…
