3-пи ноябриъ Табасаран райондин Хючна гъулаъ айи культурайин хулан гьяятдиъ, халкьдин сабвалин Йигъаз тялукь вуди, концерт кIули гъубшну. Серенжем ачмиш апIури, райондин культурайин хулан директор Аьбдулвагьаб Аьбдуловди мяракайиз уч духьнайи агьалйир райондин глава Мягьямед Къурбановдин ччвурнахъан машкврихъди тебрик гъапIнийи. Дугъу гьацира уч духьнайидариз машкврин тарихдикан, уьлкейин халкь сатIи апIбаъ дидин эгьемиятлуваликан ктибтнийи.

 

Хъасин Табасаран райондин администрацияйин культурайин, спортдин, туризмдин ва жигьиларин политикайин отдели кьувватариинди гьязур дапIнайи бицIи концерт кIули гъубшнийи. Отделин гъуллугъчйир вуйи Закарья Амирбеговди, Рустам Рамазановди ва Тельман Аьбдуллаевди ватанпервервалин мяълийир тамам гъапIнийи. Мукьмар йивурайи халкьдин оркестрира халкьдин жюрбежюр мукьмар гъивнийи.

Саб сяаьтнан арайиъ давам гъабхьи концерт, вахтназ вуди Дагъустан Республикайин Главайин вазифйир кIулиз адагъурайи Сергей Меликовдин ноябрин 3-пи йигъан кьувватнаъ убчIвнайи къарариз асас вуди, чIат, марцци гьавайихь, гизаф инсанар уч дарапIди, кIули гъубхнийи.

Халкьдин сабвалин Йигъаз бахш вуйи серенжемар райондин жара идарйириъра кIули гъушнийи. Мисалназ, Табасаран райондин кьялан библиотекайин гъурулушдин гъуллугъчйири ватанпервервалин темайиан китабарин выставка тешкил гъапIнийи.

Му йигъан Хючна гъулан кючйириъ администрацияйин дахилнаъ айи жигьиларин центрин гъуллугъчйири Гъалибвалин волонтерарихъди сатIиди «Узу – Урусатдин ватандаш вуза» кIуру республикайин дережайин акцияра кIули гъубхнийи. Дурари, райондин агьалйир машкврихъди тебрик апIури, Урусатдин гимн кайи буклетар ва Урусатдин пайдгъин рангар кайи парчийин  бицIи зулар туврайи.