Совет уьлкейин девриъ «бизнесмен», «предприниматель» кIуру гафар ухьухь айидар дайи. Жвуван кевшенариин битмиш апIуз шлу итIру сурсатар гьясил апIуйи ва масу тувуйи. Думуган ухьуз адру хайилин цIийиб гьамус а.
Предприниматель – дилаварчи кас кIуру гаф ву. Дицдар дилаварчи касар гъи ихь уьлкейиъ гизаф духьна, хъа Дагъустан Республикайиъ 2,3 агъзур кас гьисабназ гъадагъна. Мялум вуйиганси, аьхиримжи йисари ихь уьлкейиъ дишагьлийирра дилавар духьна. Ав, гъи ухьуз рякъюрайиганси, ихь базрариъ мутмйир туврайидар ва аьхю магазнарин эйсивал апIурайидар дирбаш’вал кайи дишагьлийир ву.
Дишагьлийириз хулаъра ляхин адарди дар, амма кейванивалин вазифйир тамам дапIну, бицIидаризра дилигну, дурар ляхнизра удучIвуз чалишмиш шула. Магьа улихьнаси узу гьацир сар дирбаш касдихъди чан ляхниъ гюрюшмиш гъахьунза. Думу Дербент шагьрин Гагариндин ччвурнахъ хъайи кючейиъ айи «Кент» кIуру магазиндин эйси Минаханум Къурбанова ву.
Минаханум Аьбдулягьядовна чан хизандихъди Дербент шагьриъ дуланмиш шули, хайлин йисар ву, ва ич арайиъ гъабхьи сюгьбатнаъ дугъу узуз, фици чав дилаварчивалин ляхин ккебгънуш, ктибтнийи.
«Узу аьхю хизандиъ бабкан гъахьунза ва учу ургур чйирна кьюр чве вуча. Улихьна вахтари дишагьлийириз хулаъ айи ляхин халачи вуйи. Думу вахтари халачйирин аваза айи ва дурар ужуб кьиматнахъ масу гъадагъуйи, саб халачи дубхну масу тувиган, ипIузра, алабхьузра дакьатар шулайи. Советарин заманйириъ гьарсаб гъулаъ халачйир урхру масккурар айи 1990-пи йисари Совет гьькумат гъадабгъган, халачйир урхру карханйир хусусидар дапIну, дишагьлийир ляхнихьан гъахьну. Хъа хизан дюбхну ккунду. Ва узу 1993-пи йисхъан мина базариъ ляхин апIуз хъюгъюнза. Сабпи ражну алверчивалин ляхин узу Дербент шагьриъ базариъ палтар масу туври ккебгъунза. ЦIийиди ляхин апIуз хъюгъю вахтари фукьан вушра читинди вуйи, наънан мутму хуруш, аьгъдарди, йиз ляхин ккебгънийза.
Гьамусяаьт узухъди сабси йиз чйирира ляхин апIура, ва гъийин йигъазкьан сатIиди, албагну лихурача. Гьюрмат айи йишваъ берекетра шулу кIуруганси, магьа гъи, хайлин ляхин дапIну, ужудар натижйирихъна дуфнача. Ужудар палтар айи тукан тикмиш гъапIунча. Гизаф пай мутму Турцияйиан вуйич. Учухьна гъюру аьхюну пай касарра жюрбежюр ляхнарихь, гъуллугъарихь хьайи дишагьлийир ву. Дурариз гъилигу лазим вуйи кьадар палат айич».
Минаханум Къурбановнайин чан ляхнихьна вуйи жавабдарвал ва чахъди ляхин апIурайи касарихьна вуйи рафтари, хасиятнан дугъривали дугъан хъуркьуваларин бина фу вуш, улупура.
Дугъан тукандиъ хъана жара дишагьлийирира ляхин апIура. Дурарикан сар Света Аьбдулкеримовна ву.
Светайин гафариинди, дугъу мушваъ ляхин апIури, 15 йискьан дубхьна.
«Минаханумдихъди ляхин апIури, хайлин йисар вуйиз. Мицир касдиз Аллагьдира рякъ ачухъ апIур, ва дугъан гьарсаб ляхинра улихь гъябгъюр кIури, фикир вуйиз. Гьаз гъапиш, му кас, гьар вахна инсандин гъавриъ ахъну, дугъан хил бисуз чалишмиш шулу. Ляхнизра яманди гъулай кас ву. Йиз уьмриъ гьамцир касдихъди таниш духьну, дугъахъди ляхинра апIурайивалиин узу гизаф рази вуза. Агьалйириз гьаммишан лазим шлу шей’ар ич тукандиан гьич саб вахтнара кам шулдар, тукандиз гьарган агьалйири тIалаб апIру ва гизаф лазим шлу шей’ар хуру, натижайиъ душваъ палтар кьанназ дахьну гъузурдар».
Туканчи Светайи Минаханумдиз туврайи заан кьимат дугъри кьимат ву.
Минаханум бицIи, албагу хизандин эйси ву. Чан уьмрин юлдаш Арсендихъди дуланмиш шули, дугъан 23 йис дубхьна. Дурар кьюр ужурар жигьиларин абана бабра ву.
Гъит Минаханум Аьбду-лягьядовнайиз гележегдиъра чан алверин ляхниъ ужудар хъуркьувалар ва дугъкан рази вуйи муштарйир артухъ ишри.
