Гьаму йигъари Дагъустандиз РФ-дин сагъламвал уьбхбан vинистерствойин медицинайин тяди кюмек тувру гъурулушдин кIулиъ айи пишекрин кюмекчи Николай Разумный гъафну. РД-йин сагъламвал уьбхбан министр Жамалудин Гьяжиибрагьимовдихъди гъабхьи гюрюшдиъ дурар асас вуди ихь республикайин медицинайин тяди кюмек тувру цирклин аьгьвалатнакан гъулхнийи.

 

 

Дагъустандин сагъламвал уьбхру vинистерствойин кIулиъ айири къайд гъапIганси, республика медицинайин тяди кюмек тувру бригадйирихъди бегьемди тямин дапIнадар.

«Нормативдин кагъзарин улупбариинди, 10 агъзур касдиина медицинайин тяди кюмек тувру саб десте ади ккунду. Гьамусяаьт региондиъ 189 бригада лихура, дурарикан 127 десте – духтрариндар ва 62 – фельдшерариндар ву. Му улупбариинди, 10 агъзур касдиина 0,6-тIан дестйир удубчIвурадар. Республикайин меркездиъ медицинайин тяди кюмек тувру 45 десте лихура. Региондиз аьлава вуди 75 дестесана чарасуз вуди лазим ву. Хъа миди 1000-тIан артухъ инсанар ляхнарихъди тямин апIуз мумкинвал тувра. Му учIруди дийибгънайи месэла гьял гъапIнийиш, кIулди республикайиъ, хъа асас вуди дагълу районариъ, медицинайин тяди хъубкьру кюмекнан ляхин хайлин къайдайиз хуз хьибдийи», – гъапну Жамалудин Гьяжиибрагьимовди.

Гюрюшдиъ кьюбиб терефарра республикайиъ медицинайин тяди кюмек тувру дестйир гьуркIри адрувалин месэла гьял апIбан кьатI’и план тартиб дапIну ккунивалиин дийигъну. Чарасузвал гъабхьиш, пишекрар гьязур апIбан месэла Дагъустандин vинздравди чаина гъадабгъну.

КIваин апIуз ккундучуз, аьхиримжи кьюд йисан Дагъустандиъ медицинайин тяди кюмек тувру дестйирин автопарк хайлин цIийи алапIну. Мягьячгъала шагьриъ вари йирси машинар цIийидарихъди, республикайин жара шагьрариъ санитарный автотранспорт – 50%, районариъ – 30% дигиш апIуз мумкинвал гъабхьу. Багахь гележеuдиъ республикайиъ медицинайин тяди кюмек тувру цирклин вари гъурулуш цIийи машинарихъди тямин апIиди.