Вахтназ вуди РД-йин Главайин вазифйир тамам апIурайи Сергей Меликовди ЦIийи йис улубкьайиз улихьна Урусатдин Федерацияйин ва Дагъустан Республикайин пешкешар тувбан шадлугънан серенжем кIули гъубхну.

 

Аьдат дубхьнайиганси, думу серенжемдиъ образованиейин, экономикайин, медениятдин, илимдин, спортдин, гъулан мяишатдин ва гьацира тикилишчивалин, инсанарин уьмур ва сагъламвал уьбхбан ва хайлин жара цирклариъ заан хъуркьувалар улупу касар лишанлу гъапIнийи.

«Шаксузди, гъи гьамшваз уч духьнайидар вари сабди сатIи апIура – Дагъустандиъ уьмур ужу апIуз чалимшиш хьували. Ктабхъурайи йис рягьятуб гъабхьундар. Мицдар вахтари гьарсар касдин яратмиш апIбан зегьмет фукьан важиблу вуш, пишекрарин гьар йигъандин ляхниз фициб аьхю мяна аш, ачухъди гъавриъ ахърава», – къайд гъапIнийи серенжемдин кIулиъ региондин Главайи.

Аьхю шадвалиинди мялум апIуз ккундучузки, Сергей Меликовдин хил’ан гьюкуматдин пешкешар тувдарин арайиъ табасаран миллетдин вакиларра айи.

«Ихь арайиъ АПК-йин тешкилатариъ гъадагъу зегьметнан хъуркьувалариз лигну, лишанлу апIурайи «ДКК-СТ» ООО-йин аьхюну агроном Ражабов Тимур Азимович а. Гьамцдар хъуркьувалар гъадагъуваликан Дагъустандин артмиш’вал ва хушбахтвал арайиз гъюра», – кIури, къайд дапIну, Сергей Аьлимовичди Табасаран райондин СиртIич гъулан агьали Тимур Ражабов «Дагъустан Республикайин гъулан мяишатдин лайикьлу гъуллугъчи» ччвур тувбан документарихъди лишанлу гъапIнийи.

Мялимарин жямяаьтлугъра фикир тутрувди гъибтундайи. Гьаци, Хив райондин А.М.Юсуфовдин ччвурнахъ хъайи Заан Ярккарин бинайин уьмуми образование тувру мектебдиъ химияйианна биологияйиан дарсар киври, 28 йисандин тажруба айи, дагъустандин педагогвалин мектебдин варитIан ужадарсдар аьдатар намуслуди давам апIурайи Исаев Муса Садикьовичдиз «Дагъустан Республикайин лайикьлу мялим» кIуру ччвур тувнийи.

«Табасарандин нурар» газатдин редакцияйин вари коллективди, ихь бажаранлу ватанагьлийир му заан ччвурар тувбахъди марцци кIваан мубарак апIури, дурариз гележегдиъ хъана заан хъуркьувалар гъадагъуз сагъ’вал ккун апIура.