29-пи декабриъ вахтназ вуди Дагъустан Республикайин Главайин вазифйир тамам апIурайи Сергей Меликовди республикайин Правительствойин цIийи состав дюзмиш гъапIну.
Чан къарарниинди дугъу улихьна РД-йин Главайин ва Правительствойин администрацияйин кIулиъ айирин заместителди лихури гъахьи Нюсрет Уьмаров РД-йин Правительствойин председателин сарпи заместителди тяйин гъапIну. Н.Уьмаровди республикайин Правительствойин экономикайин блок ва милли проектар уьмриз юрутмиш апIувалихъан жавабдарвал гъабхиди.
Дидланра савайи, РД-йин Правительствойин председателин сарсан сарпи заместителди улихьган республикайин промышленностдин ва алверчивалин министрин вазифйир тамам апIурайи Батыр Эмеев тасдикь гъапIну.
Вахтназ вуди РД-йин Правительствойин предсе-дателин заместителарди Анатолий Карибов, Владимир Лемешко, Аьбдулмуслим Аьбдулмуслимов дерккну. Вице-премьер Рамазан Жяфаров чан улихьгандин гъуллугънаъ гъузди. Сарсан вице-премьерди Муслим Телякавов дерккну.
Министерствйирикан ва имбу гъуллугъарикан улхуруш, чпин вазифйир тамам апIури ами Нариман Къазимягьямедовди (МЧС), Камил Сяидовди (жигьиларин ляхнариз лигру министерство). Вахтназ вуди чпин улихьгандин гъуллугънан вазифйир тамам апIуз мумкинвал тувну Малик Баглиевдиз (тикилишчивалин министерство), Зарема Бутаевайиз (культурайин министерство), Ширухан Гьяжимурадовдиз (транспортдин ва рякъярин мяишатдин министерство), Энрик Селимовдиз (милли политикайин ва динарин ляхнариз лигру министерство), Расул Ибрагьимовдиз (туризмдин ва халкьдин художествойин сяняаьтарин министерство), Мягьямед Мягьямедовдиз (физкультурайин ва спортдин министерство), Изумруд Мюгьюдиновайиз (зегьметнан ва яшайишдин артмиш’валин министерст- во), Юнус Сяаьдуевдиз (финансарин министерство), Къазимягьямед Сефикъурбановдиз (юстицияйин министерство) ва Уммупазиль Уьмаровайиз (образованиейинна илимдин министерство), гьюкуматдин закупкйир апIру комитетдин кIулиъ айи Жяфар Гьяжибеговдиз.
Улихьган вахтназ вуди яркврарин мяишатдин комитетдин руководителин вазиф-йир тамам апIурайи Вагьаб Аьбдулгьямидов гьамус тамам руководителди дерккна.
Гьамдихъди сабси, Сергей Меликовди саб жерге министерствйирин ва ведомствйирин кIулиъ таза гъуллугъчйир дерккну. Гьаци, жилин ва мал-мутмуйин аьлакьйирин министр Заур Эминов гъахьну, хъа табиаьтдин дакьатарин ва экологияйин министрин вазифйир вахтназ вуди Рягьман Гьямидовди тамам апIиди. Вахтназ вуди сагъламвал уьбхбан министрин вазифйир, улихьган министрин заместитель вуйи Татяна Беляевайи кIули гъахиди. ЦIийиди тяйин гъапIну промышленостдин ва алверчивалин министр – Низам Халилов, экономикайин ва аьтрафарин артмиш’валин министр – Руслан Аьлиев, гъулан мяишатдин ва ипIру убхъру сурсатарин министр – Баттал Батталов, энергетикайин ва ЖКХ-йин министр – Манвел Мажонц гъахьну. Тарифариз лигру республикайин гъуллугънан кIулиъ Камил Аьлигалбацев, ветеринарияйин комитетдин кIулиъ Мягьямед Шапиев тасдикь гъапIну.
Вахтназ вуди культурайин ирс уьбхру агентствойин кIулиъ Мягьяч Мусаев, Гьюкуматдин хулар-йишварин инспекцияйин кIулиъ Сергей Касьянов дерккну.
Улихьгандин Минкомсвязь кьюб министерствойиз пай гъапIну – цифровой арт-миш’валин министерство (вахтназ вуди дидин кIулиъ Сергей Снегирев тяйин дапIна) ва мялуматаринна чап апIбан министерство – министр Уьмаруьсман Гьяжиев гъахьну. ЦIийиди яратмиш апIурайи гьюкуматдин финансарин гюзчивалин гъуллугънан руководителди Мягьяч Ибрагьимов дерккну.
Натижйир йивури, пуз шулу, Дагъустан Республикайин цIийи Правительствойин дахилнаъ кьюр ихь ватанагьлийир а – Нюсрет Уьмаров (сабпи шиклиъ) ва Къазимягьямед Сефикъурбанов (кьюбпи шиклиъ). Дурар кьюридра му хъуркьуваларихъди тебрик апIури, газатдин терефнаан дурариз жандин сагъламвал, багъри халкь ва республика бадали марцци зегьмет зигуз артухъси кьувватар ккун апIурача.
