Деври жямяаьтлугъдин улихь гьар йигъан цIийи месэлйир дивра. Дурар заан дережайиъди гьял апIбак мялимари чпин лайикьлу пай кивра. «Мялим» кIуру гафнан сифте мяна грек чIалнаан ихь чIалназ таржума гъапIиган, «хил дибисну, бицIир улихъ гъахурайир» ву. Гьаци хьузра ву – мялимди гьарсар жигьилин уьмрин шибритI дивбаъ, дугъан хасият дюзмиш ва думу тербияламиш апIбаъ важиблу роль уйнамиш апIуру.
Аьхю шулайи наслиз ужуб тербия ва аьгъювалар тувбаъ заан натижйир улупурайи мялимарикан сар ихь ватанагьли, Дагъ. Огни шагьрин 2-пи нумрайин мектебдиъ физкультурайиан ва ОБЖ-йиан дарсар киврайи Аният Гьяйбатовара (шиклиъ) ву.
Гъубшу йисан ноябриъ экстремизмдин профилактика гъабхбан темайиан республикайиъ кIули гъубшу конкурсдиз методика жигьатнаан ужуб дарс тартиб апIбаз лигну, думу 2-пи йишван сагьиб гъахьну ва РД-йин образованиейинна илимдин министерствойин дипломдиинди лишанлу гъапIну.
Ич мухбир Умгьанат Сулеймановайи Аният Гьейбатовайихъди сюгьбат гъубхну.
– Аният Небиевна, увусдар мялимар айивал мектебдиз заанвал ву. Ихь гъийин сюгьбатнан эвелиъ жикъиди увкан ва уву апIурайи ляхникан ктибтуб ккун апIураза.
– Узу, Мягьярамкент райондиъ Кирка гъулан мектеб ккудубкIну, 1998-пи йисан Дербент шагьриъ педагогвалин колледждиъ ккергъбан классариз дарсар кивру мялимар гьязур апIру факультетдик урхуз кучIвунза ва 2003-пи йисан думу ккудубкIунза. Гьадму йисан узу Дагъ. Огни шагърин агьалийиз швувди гъушунза ва душваъ 2-пи нумрайин мектебдиъ ляхниъра дийигъунза. Кьандиси, заан образование гъадабгъбан бадали, Социалинна педагогвалин институтдин физический культурайин факультетдик урхуз кучIвунза ва 2015-пи йисан думура ккудубкIунза.
Мялимвалин пише гьеле би-цIидимиди ккуниб вуйзуз. Гьаддиз аьшкьлуди, бицIидарихьна ккунивалин гьиссар ади ляхин апIураза. Жвуву апIурайи ляхнихьна аьшкь адарш, думу заан дережайиъди кIули гъабхуз шулдар. Мидланра гъайри, мялимдин жавабдарвалра аьхюб ву, диплом хьа дупну, мялимвал апIуз шлихьан вушра удукьруб дар. Зегьметниин аьшкьламиш духьнайи, урхурайидар кIваантIан ккуни мялимдизтIан халис мялим пуз шулдар. Уву бицIидариз фициб рякъ улупиш, дурар гьадму рякъюъди гъягъиди. Зегьметниин юкIв алиган, ляхниъ ужудар хъуркьуваларра шулу. Гьамусяаьт 9-пи классдин руководитель вуза ва йиз классдиъ урхурайидариин гизаф рази вуза. Чпиз табшурмиш гъапIу ляхнар дурари жавабдарвалиинди тамам апIуру, дарсар урхбахьнара ужуди янашмиш шулу. Йиз классдихъди хайлин конкурсариъ иштирак шули, пешкешнан йишвар гъазанмиш гъапIунча. Республикайин олимпиадйириъа 2-пи, 3-пи йишвар гъадагъури гъахьунча.
– Улихьна заманйириъ ихь яшлу-йири, дишагьлийи хулан ва мяишатдин ляхнартIан дапIну ккундар кIури, текрар апIури шуйи. Хъа гъийин девриъ дишагьлийихьан фициб вушра ляхин апIуз шулу. Мисалназ, уву физкультурайин дарсар киврава…
– Мялимди киврайи фунуб дарсра дарс ву. Хъа дишагьлийи физкультурайиан дарсар киврайивал аьламатнан ляхин дар, фицики дишагьли аьрш-дизра кмиди гъитIирхну. Йиз дарсар, дугъриданра, маракьлуди гъягъюри шулу. Физкультура ву дупну, узу баяр-шубариз дици азадвал туври шулдарза. Йиз дарснаан баяр-шубарихьна, жара дарсарианси, ижми тIалабар ади шулиз. Физкультурайин дарс, уччвуди фикир гъапIиш, варитIан ужуб дарс ву. Думу инсандин уьмур ярхи апIурайи дарман ву. Физкультура ва спорт физический ляхин апIурайи касаризра гизаф мянфяаьтлу ву, фицики му дарсариъ гъахурайи тренировкйири инсандин скелет, кIван ва бедендин табар, эл хътабгъбан, ифи либхбан, нервйирин ва жара гьендемарин гъурулушар мюгькам апIуру. Узу апIурайи ляхниин фукьан вушра рази вуза.
Аният Гьейбатовайи чан зегьметнан рякъюъ баракаллувал гъазанмиш дапIна. Думу гьацира ВФСК ГТО-йин гъизилин лишниинди, жара пешкешариинди лишанлу дапIна, Дагъ. Огни шагьрин образованиейин управлениейи тешкил гъапIу жюрбежюр конкурсариъ иштирак духьну, пешкешнан йишварин сагьиб духьна. Аниятдин зегьметниин юкIв аливал, читинвалариз табигъ даршлувал – му анжагъ халис мялимдизтIан хас дару лишнар ву. Гъит гележегдиъ дугъаз хъанара заан хъуркьувалар ишри.
