2021-пи йисан 15-пи январиъ РД-йин художникарин союздин залиъ «Дагъустандин булагъар» кIуру выставка кIули гъубшну. Думу выставка ДАССР-ин 100-йис хьпаз бахш дапIнайиб вуйи. Выставкйир гъахру залин цалар Табасаран, Хив ва Агъул районариан духнайи, хиларихьди гъурху халачйирихьди дабалгнайи.
Душваъ хиларихьди гъургъу къумугъарин халкьдин «тастар» кIуру шалар ва ягълухъар, Къяйтагъ райондин парчйирин чIукIарикан накьишар кади дидирхнайи шей’ар, бежтIинарин «ГькIя» кIуру гъургъу ликариин алахьрудар, Дагъустандин кьибла терефнаъ айи устадари гъургъу атIнар, тIипприйир, Балхар, Испик ва Сулевкент гъулариъ батIрикан дапIнайи алатар, Къубачийиан вуйи устйирин рукьан, гакIвлин ва заргарвалин уьмаратар ва яракь, урус халкьдин гьяклар, жаквлар ва саб хайлин жара экспонатарра айи.
Сережемдиъ республикайин 21 райондиан ва шагьрариан 48 устадари чпин яратмишар улупнийи, хъа уьмуми гьисабариинди, выставкайиз 200-тIан артухъ жюрбежюр экспонатар духнайи.
Выставкайин хялариз РД-йин культурайин министр Зарема Бутаевайин терефнаан саламар хьади, дугъан заместитель, халкьдин яратмиш апIбан Хулан директор Марита Мугадова удучIвну гъулхнийи.
«Ухьу гьарсари, ихь халкьдин аьдатар, гьацира халкьдин художествойин кесп-йир уьрхбан бадали, ихь пай кивну ккунду. Гьамина духнайи вари алатар Дагъустан Республикайикан мялуматар кайи кIажарси гьисаб ву. Гьамрарин кюмекниинди дуфнайи хялариз ихь аьдатарикан, культурайикан, дагъустан устадари ктау халкьдин алатарикан аьгъю хьибди. Ухьу ихь устадари кадаънайи алатарин кюмекниинди вари дюн’яйин культурайихъди вуйи аьлакьа мюгькам апIурахьа»,
– гъапнийи Марита Мугадовайи.
Хъасин дугъу выставкайин вари иштиракчйир РД-йин культурайин министрин дипломарихъди лишанлу гъапIну. Табасаран райондиан Барият Исмяиловайи халачи убхбан мастер-классдиан, Низакет Аьбдуселимовайи хьайин атIнар ва тIипприйир ургъбаан, Зиявудин Гьяжи-евди (сабпи шиклиъ) гакIв-лин муччврар ва жара алатар ктаъбаан, хъа Хив райондиан Зайнабханум Жангутаевайи ва Альбина Аьбдурягьмановайи (кьюбпи шиклиъ арччлахъанди сарпир) атIнар ва жара мутмйир ургъбаан дипломар гъадагъну.
Дипломарихъди лишанлу апIбан кьяляхъ, устадари выставкайиз дуфнайи хялариз – РД-йин художникарин союздин вакилариз, культурайин цирклин гъуллугъчйириз, журналистариз, аьдати агьалйириз – мастер-классар улупну, чпин сяняаьткарвалин сирар ачмиш гъапIну. Гьаци, Хив райондин дуфнайи Изаят Межидовайи ва Жамиля Азиятовайи чпи выставкайиъ иштирак хьпан метлеб ачмиш гъапIнийи. «Учу мина халачйир, гьалвар, карчу накьишар кайидар, гобеленар духнача. Гьарсаб халачи лап аьхю зегьмет айиб ву. Халачи гьязур апIбан бадали, са-сабди гугар алахьури, гизаф йигъар гъягъюру. Кьялан гьисабариинди, саб метр халачи убхуз кьюб ваз лазим ву. Сабан дидин дючIюбкьнайивализ, халачи швнуб гуг ккайиб вуш лигуру, хъасин дидин шикил зигуру ва убхуз хъюгъру», – гъапнийи дурари.
Выставка 30-пи январизкьан Мягьячгъалайиъ Р. Гьямзатовдин ччвурнахъ хъайи кючейиъ айи 113а хулаъ – РД-йин художникарин союздин залиъ кIули гъябгъиди. Аьшкь айидарихьан, элгьет йигъан ктарди, гвачIнин сяаьт 10-диан хябяхъган сяаьт 5-дизкьан дина гъюз шулу.
