Магьа нубатнан ражари Ватан уьбхрурин Йигъ (23-пи февраль) улубкьура. Му машкврихъди неинки ватандиз гъуллугъ апIурайи эскрар, хъа гьацира вари жилар тебрик апIури шулхьа.
Ватандиз гъуллугъ апIу-райи эскрарин гьисабназ военный училищйириъ урхурайи живанарра гъадагъуз шулу. Гьацдар училищйирикан саб – 2000-пи йисан Владикавказ шагьриъ ачмиш гъапIу Кафари Кавказдин суворовдин военный училищера ву. Училищейин асас метлеб – бицIидариз асас кьялан образование тувувал, дурар бицIидимиди Ватандиз гъуллугъназ гьязур апIувал ва гьацира дурарин культура, фагьум, аькьюл ва эдеблувал артмиш апIувал ву.
Гъи йиз макьалайиъ гьадму училищейиъ бицIи-димиди Ватан уьбхбан рякъюъди гъягъюз гьязур шулайи, Хив райондин Гьаригъ гъул’ан вуйи, Каспийск шагьриъ яшамиш шулайи чвйир Гьяжигъурбан ва Рустам Гьяжимурадоварикан (шиклиъ) бикIуз ккундузуз.
Гьяжигъурбну училищейин 1-пи взводдин 2-пи ротайин 8-пи классдиъ, хъа Рустамди 2-пи взводдин 6-пи ротайин 5-пи классдиъ урхура.
Ич арайиъ гъабхьи сюгьбатнаъ Гьяжигъурбну мялум гъапIганси, думу му училищейиз гъюб’ин зат швумал дар.
«Мушваъ урхури сарун 4-пи йис вуйиз. Му муддатнан арайиъ урхбаъ зат читинвалар алахьундарзуз. Мялимарра ужудар ву, кюмек лазим дубхьну, чпихьна илтIикIиган, кюмекназ зат ваъ кIурдар. Урхбаъ ясана военный жигьатнаан гьязур хьувалиъ узуз зат гъагъиди алабхъурадарзуз, фицики йиз абйир-бабари узухъди аьлакьалу апIурайи умудар кIулиз адагъну ккунду»,
– къайд гъапIнийи дугъу.
Пуб лазим вуки, Гьяжи-гъурбан Гьяжимурадов чав урхурайи училищейин терефнаан 2019-пи йисан Москвайиъ кIули гъубшу литературайин конкурсдиъра иштирак гъахьну. Душваъ дугъу сабпи йишв гъазанмиш гъапIну. Мидланра гъайри, урхбаан вуйи швнуб-саб жара конкурсариъри дугъу пешкешнан йишвар гъадагъна. Урхбахъди сабси, му бай спортдиинра машгъул ву. 2019-пи йисан Кафари Кавказдин военный округдиъ армияйин хиларихъди кчIихбаан кIули гъушу талитариъ Гьяжигъурбан 2-пи йишван сагьиб гъахьну.
Ич сюгьбат давам апIури, урхбан гьякьнаан Рустамдира чан фикрар ачухъ гъапIнийи.
Дугъан гафариинди, училищейиз думу сач сентябрин эвелариъ гъафну.
«ИкибаштIан, сифте узуз мушваъ урхуз гъагъиди вуйзуз. Йиз фикрар дарсарикан дайиз, узуз хулаз йиз дадайихьна, адашдихьна, бицIину чуччухьна гъягъюз ккундийзуз. Хъа яваш-явашди вердиш гъахьунза. Йиз аьхюну гъардашра мушваъ айивал вари терефариан кюмек шулазуз. Дугъу, узуз аьгъдруб улупури, таниш дарубдихъди таниш апIури шулу. Гьамус сарун дарсарра ужуди урхураза ва военный ляхнарихьнара кIваантIан гьязур шулаза»,
– гъапну Рустамди.
Гъит му кьюрид чвйириз урхбаъси, спортдиъра ва чпи кадабгънайи уьмрин ря-къюъра ужудар хъуркьувалар ишри.