Рякъяр уьмрин дамарар ву, кIури шулу. Хъа, гьяйифки, хайлин йишвариъ гъи ужудар рякъяр айивалиинди дамагъ апIуз шулдар. Иллагьки йифар гьеерцIиган хьадукра арайиз гъюру кьалу штарин нирари рякъяр къайдайиан адауру. Фунуб гъуланра агьалйирихъди гаф-чIал апIру вахтна, дурарин сабпи дерди гъулан рякъяр пис гьялнаъ айиваликан вуди шулу. Табасаран райондин рякъяр лазим вуйи къайдайиъ дюрхну ккуни идарайин жавабдар касар, цIибди вушра, рякъярин гъайгъушнаъ шлувал рябкъюру.
Табасаран райондин рякъярин кьюрдун вахтнахьна вуйи гьязурлугъ’валикан узуз «Табасаран райондин ДТП №33» АО-йин аьхюну инженер Уьсман Аьлимирзаевди ктибтнийи.
«Табасаран райондин рякъяриин аварйирин ва жара бедбахтвалин дюшюшарин кьадар кьюрдун вахтна цIиб хьпан бадали, «Табасаран райондин ДТП №33» АО-йи 2020-2021-пи йисариз саб хайлин уьлчмйир кьабул дапIна.
Йифар дургъну рякъяр читин гьялнаъ гъахьиш, дурар марцц апIбан бадали, техникара, инсанарра гьаммишан гьязурди гъитнача. Механизатораризна жара ляхнар тамам апIру касариз, ляхниъ эрг’вал йивурайи вахтна рягьятвал гъадабгъбан ва жандиз мани апIбан бадали, халра гьязур дапIнийич. Йиф марцц дапIну, миркк йивнайи рякъяриин тялукь материал алабхьбан бадали, лазим вуйи техникара гьязур дапIнача – 1 КДМ, автогрейдерар, бульдозер, 1 жара машинариъ гъагъ абхьру машин. Мидланра гъайри, рякъяриин миркк дибрисбан бадали, дурариин алабхьру, кьилахьди кибикьнайи материал кьюрд улубкьайиз вахт ккимиди гьязур гъапIнийча. Техника зат дидрибгъди либх-бан бадали, кьюрдуз лазим вуйи соляркара масу гъадабгънийча. Жавабдар гъуллугъчйири нубатчивал гъабхбан бадали, графикра дюзмиш дапIна. Лап хатIалу йишварихь, рякъюн учIру ва тик’вал айи мурччвариин алабхьуз харайиинди дабхьнайи, кьилахьди дибикьнайи гъум гъабхунча»,
– къайд гъапIнийи дугъу.
Му касари чпиин алиб апIура – гьар йисан кьюрдну рякъяр рас апIувалин ляхнар кIули гъахура. Хъа рякъ рас гъапIну кIури, думу уьбхрурра духьну ккунду, аьхир. Ухьу рякъюзди чIуруб-чIюрхюб гатIабхьури, кьалу штар удурзури гъахьиш, рякъ, икибаштIан, къайдайиъ гъудрубзур. Йиз фикриан, рякъярин идарайин пишекрарси, думу рякъ къайдайиъ уьбхбан ухьура, вари агьалйир, жавабдарар вухьа. Ухьуз айиб ухьу дюрюбхиш, жарадари думу затра дюрюбхюр.
