Гъябгъюрайи йисан Табасаран райондиъ сабпиб вуди Гъулли гъулаъ 50 касдихьнакьан инсанарихьан рягьятвал гъадабгъуз шлу туриствалин база ачмиш апIуз планламиш дапIна. Тикилишчивалин ляхнар цци хьадну ккергъди.
Турбазайин гьякьнаан Табасаран райондин глава Мягьямед Къурбановди туву мялуматниинди, кьюд йисандин арайиъ му проект уьмриз кечирмиш апIбаз 30 миллион манат инвестор Гьюсейни Халибеговди харж апIиди.
«Дилаварчи кас, меценат Гьюсейни Халибеговра хъади Гъулли гъулаз душну, му месэлайин гьякьнаан гъулан агьалйирихъди гаф-чIал гъапIунча. Гъуландариз теклиф кьабул гъабхьну ва, душваъ туриствалин база яратмиш апIбан бадали, жил жара апIуз чпин разивал улупну. Пуб лазим вуки, проектдин дахилнаъди му объектдиин 10 бицIи хулар, сейир апIуз парк, саб ресторан дивди ва лихру йишварра ачмиш апIиди. Душваъ гьацира гьяйвнарин спортра ва ликри гъягъру туриствалин рякъярра артмиш апIиди»,
– гъапнийи райондин главайи.
Табасаран райондиъ туриствал артмиш апIуз лазим вуйи саки вари шартIар а. Аьхиримжи вахтари райондиз гъюрайи туристарин кьадарра хайлин артухъ дубхьна, амма жара районарихъди тевиган, гьелелиг цIибтIан дар.
«Табасаран район Дагъустандин туриствал артмиш апIуз мумкинвалар айи районарикан саб ву. Райондиъ айи Рибчрариина, Ургур чвуччвунна сар чуччун гъалайиина, табиаьтдин гъяд’ина, Дюрхъяз ва жара йишвариз гьар йисан агъзрариинди туристар гъюра. Дурарин кьадар артухъ апIбан бадали, учу айи вари мумкинвалар ишлетмиш апIурача»,
– аьлава гъапIнийи Мягьямед Къурбановди.
Тикмиш апIуз ккайи турбазайин гьякьнаан меценат Гьюсейни Халибеговдиканра чан фикрар пуб ккун гъапIнийза.
Шикил Иса Аьбдурягьмановди гъивуб ву.
«Узу Дербент шагьриъ яшамиш шулашра, вахт-вахтарик гъулаз гъягъюри шулза.
Узухьна Урусатдиан мотоциклйириинди хатIалувал айи спортдин жюрейиин машгъул вуйи хайлин дус-тарра гъюри шулу. Гьацдар касар гъюрайивализ лигну, йиз багъри гъулаъ база ачмиш апIуз планламиш гъапIунза. Гъул, йишв, табиаьт ужудар ву. Гьелелиг инфраструктура багарихь хьтар. 200 метрин рякъра дапIну, шидра дизигну ккунду. Му вари ляхнар кьюд йисандин арайиъ дапIну ккудукIидича.
Сабсан гьял дапIну ккуни месэла гъубзра. Асас вуди сентябрин эвелариан майизкьан туристарин кьадар лап кам шулу. База гьаму вахтна ичIиди гъудрубзбан бадали, шагьур гъабтIу хизанар, вахтназ вуди дуфну, гьадушваъ яшамиш хьуз шлу мумкинваларра агурача»,
– гъапну Гьюсейни Халибеговди.
Дарпиди гъибтуз шулдар. Гьюсейни Халибегов чан ватандихъан, багъри гъулхъан юкIв убгурайи кас ву. Айи мялуматариинди, 2007-2008-пи йисари дугъу чан хусуси дакьатарихъ Гъулли гъулаз гъябгъюрайи 4,5 километрин рякъра рас гъапIну. Гьамцдар ужудар ляхнар дугъу гъира апIура.
