Улихьна йигъари Москва шагьриъ спортдин грепплинг жюрейиан кIули гъубшу AJP Grand SIam турнириъ ихь ватанагьли Рамазан Гьясратовди 77 кило гъагъ айи спортсменарин арайиъ гъахьи талитариъ сабпи йишв гъадабгъну.

 

Къайд апIуб лазим вуки, му жигьил аьхиримжи йисари хъади-хъади швнуб-саб чемпионатдиъ, турнириъ гъалиб духьна.
Мягьячгъалайиъ айи Аьсгьабяли Халидовдин ва Гьяжимурад Аьбдуллаевдин хиликкди спортдиан ужудар хъуркьувалар улупурайи Рамазан Гьясратовдихъди турнирин кьяляхъ учура сюгьбат гъубхунча. Дугъан гафариинди, грепплингдиан вари дюн’яйин чемпионатдин кьяляхъ, гьаму AJP Grand Slam турнир варитIан гъагъибси гьисаб апIура.

«Му турнириъ узу, саб жюрейин читинвалар адарди, кчIихбариъ 3 ражари гъалиб гъахьунза. Финалиъ ихь ватанагьлийихъди, 4 ражари вари дюн’яйин чемпион вуйи Ризван Ризвановдихъди кчIихувал алабхъунзуз. Ужуди гьязур духьнайир вушра, дугъахьди узу ккагъуз гъитундарза.
Талитариз удудучIврира гизаф вахт вуйиз. Вушра, гьаммишан тренировкйириз гъягъюраза. Гьаму турнириз кьюб вазлин арайиъ гьязур гъахьунза», – ктибтнийи гъалибчийи.

Сюгьбатнан аьхириъ Р. Гьясратовди чан хъуркьуваларин сирра ачмиш гъапIнийи – спортсменди, чан улихь аьхю метлеб дивну, гьаддихьна ухди хъуркьруганси, жвуван жандин гьяйиф дарапIди, зегьмет дизигну ккунду. Гъит учв Рамазанра, ужудар натижйир улупури, чан варитIан азгар метлебнахъ ухди хъуркьри.