Ухьуз варидариз мялум вуйиганси, Астрахань шагьриъ ерлешмиш дубхьнайи Каспийин флотилия Каспийск шагьриз кючмиш гъапIну. Му ихь уьлкейин кIулиъ айидарин ва Урусатдин оборонайин министерствойин, ужуди фикир дапIну, адабгънайи къарар ву, фицики ВМФ-дин кьувватар ихь гьюкуматдин сяргьятарихьна багахь гъапIну.
Тмунуб терефнаан, Астрахандихьан тафавутлу вуди, Каспийскдиъ ВМФ-дин гимйири кIулди вари йисан ляхин апIури хьибди, гьаз гъапиш Каспийскдиъ дурар дийигъру портназ кьюрдну миркк йивурдар. Мидкан ихь республикайизра, асас вуди Каспийск шагьриз, аьхю хайир а. Фицики гьамусяаьт саки ляхин дарапIди дийигънайи республикайин зурба карханйириз, мушвахь, мисал вуди, Каспийск шагьриъ ерлешмиш духьнайи «Дагдизель», «Каспийскдин дюз механикайин завод», Мягьячгъалайиъ айи «Мягьямед Гьяжиевдин ччвурнахъ хъайи завод», «Авиаагрегат» ва республикайин гьацдар жара хайлин карханйир улупуз шулу, РФ-дин оборонайин министерствойин заказар хьиди, ва дурари му караханйир чIиви ва дурарин ляхин къайдайиз хибди.
Гъубшу гьяфтайин аьхириъ Дагъустандиз гъафи Урусатдин Федерацияйин оборонайин министерствойин ВМФ-дин делегация, Каспийин флотилияйин жягьтлувалиинди, Къизлар шагьриъ ерлешмиш дубхьнайи «Концерн КЭМЗ» ОАО-йиз гъафну.
«ВМФ-дин вакилариз концерндин техника жигьатнаан айи гужли мумкинвалар улупну. Думу мумкинваларин аьхюну пай гъийин девриз ярамиш вуйи авадлугъари бисура. Карханайин директор Ибрагьим Аьгьматовди хялар душваъ гьясил апIурайи жюрбежюр шей`арихъди таниш гъапIну. Дуфнайи хялариз асас вуди тясир гъапIуб пучIу моторар айи, жюрбежюр метлебариз ишлетмиш апIуз шлу самолётарна вертолётар яратмиш апIру, гьадму гьисабнаан МАИ-411 самолётра, цIийи цех вуйи. Карханайин кIулиъ айири къайд гъапIганси, цIийи корпус хусуси дакьатарихъ ва лап жикъи вахтнан арайиъ самолётар уч апIуз дивуб ву»,
– мялум гъапIну заводдин пресс-гъуллугънан вакили.
Ибрагьим Аьгьматовдин гафариинди, карханайин цIийи дараматар дивнайи майдандин яркьушнан уьмуми кьадар 10 агъзур квадратдин метртIан артухъ ву. Дугъу гьацира хялариз, республикайиъ бицIи авиация артмиш апIбан бадали, концерндиз чан авиакомпания айиваликан ктибтну. «КЭМЗ АВИА» авиакомпанияйиз самолётарна вертолётар ишлетмиш апIуз ихтияр туврайи сертификатра, шубуб Ан-2, саб – СЛ-2 ва гьацира жюрбежюр метлебариз ишлетмиш апIуз шлу – МАИ-411самолётарра а.
«Ккудубшу йисан РД-йин Шамил райондин Мачада гъулаъ ич хусуси дакьатарихъ, гьюлин штун дережайихьан 2200 метрин ягълишнаъ ади, Урусатдиъ варитIан ягъал- ди дагълариъ ерлешмиш дубхьнайи самолетар тIирхру ва дурсру майдан тикмиш гъапIунча. Хъа Голотль гъулаъ гьюлин штун дережайихьан 780 метрин ягълишнаъ самолётар дурсру ва гъудужвру 600 метрин ярхишин айи зул рас гъапIунча. Ич «КЭМЗ АВИА» авиакомпанияйин Ан-2 самолётди Къизлар – Мачада – Къизлар маршрутдиъди ахтармиш апIбан тIибхувалра хъуркьувалиинди тамам гъапIну»,
– ктибтну чпи кIули гъуху ляхнарикан карханайин директори.
Оборонайин министерствойин терефнаан заказар духьну, гьюкуматдин терефнаан кюмек тувну, Ибрагьим Аьгьматов кIулиъ ади, «Концерн КЭМЗ» ОАО-йиъ лихурайи гъуллугъчйир чпин мурад-метлебарихъ хъуркьди ва багарихьди ихь республикайиъра бицIи авиацияйин хусуси авиакомпания яратмиш апIиди кIури, умуд кивдихьа. Эгер му метлеб кIулиз адабгъуз гъабхьиш, инсанар читиндитIан гъягъюз даршлу йишвариз гъахбан, дицдар йишвариъ гъагъиди иццурайидариз медицинайин кюмек тувбан, республикайиъ туризм, гъулан мяишат артмиш апIбан, табиаьт уьбхбан ва гьацдар жара хайлин месэлйир гьял апIуз мумкинвал шуйи.
