Хив район 1935-пи йисан мартдин аьхирариъ 15 гъулан ерли поселенйирин бинайиин арайиз гъафну. Хив гъул райондин центрди тяйин гъапIнийи. Кьибла Дагъустандиъ жилар тIурччвбахъди аьлакьалу вуди, 1966-пи йисан Хив райондиъра артмиш’валин дигиш’валар хьуз хъюгъну. Яшлуйири субут апIурайиганси, думу бедбахтвалин натижайиъ хайлин зарарарра гъахьнийи.
«Жилар дутIурччвну кьюд йигълан Хивна Дагъустандин кIулиъ айидарин делегация гъафну. Дурарин арайиъ РСФСР-ин Верховный Советдин Председатель А.Яснов, ДАССР-ин КПСС-дин обкомдин сарпи секретарь А.Д.Даниялов, ДАССР-ин КПСС-дин кьюрпи секретарь А.В.Корешков, РСФСР-ин агьалйирин гъуллугъар гьуркIбан министр С.В.Бутусов, ДАССР-ин агьалйирин гъуллугъар гьуркIбан министр М.Митаров айи.
Гьадму йигъан партияйин райкомдиъ идарайиъ гъабхьи совещаниейиъ жилар гъутIурччвиган гъахьи зарарар терг апIбан вари жюре уьлчмйир кьабул апIбан гьякьнаан къарарра кьабул гъапIнийи. Кьяляхъна Хив райондиъ «Хивский», «Сафаралиевский», «Юзбеговский», «Сенгеровский» цIийи совхозарра арайиз гъафнийи. Жилар тIурччвбакан гизаф зарар гъабхьи гъуларин агьалйир Дербент ва Гъяякент районариз кючмиш гъахьнийи», – кIваина хура гьадму йисари гьюкуматдин гъуллугънаъ айи Жаруллагь Агъабалаевди.
МО-йин глава Ярмет Ярметовди Хив райондин жямяаьтлугъ райондин 86 йис тамам хьпахъди тебрик гъапIну.
«Гьюрматлу ватанагьлийир!
Учвкан гьарсар район арайиз гъафи йигъахъди марцци кIваан тебрик апIураза!
Хив райондин агьалйири 86 йисандин муддатнаъ баркаллу рякъ ккадапIну. Вари уьлкейин жямяаьтлугъдихъди сабси, дурари жюрбежюр дявйирин кьяляхъ читин аьгьвалатнаъ айи гьюкуматдин экономика за апIбак лайикьлу пай кивну. Баркаллу зегьметниинди район Урусатдиз, вари дюн’яйиз машгьур гъапIу гьарсар ватандашдиинди дамагълу вухьа!
Аьсрариинди кьувватнаъ ипнайи гьялал зегьметниинди район артмиш апIбан аьдатар гележегдиъра давам апIидихьа.
Гъит райондин аьтрафариин гьарсаб вахтна ислягьвали агъавал апIри!» – гъапну дугъу.
