Ватандин Аьхю дявдин Гъалибвал гъадабгъну 76 йис хьпан гъаншариъ Хив райондиъ вахтсуз вуди уьмриан гъушу РД-йин лайикьлу духтир Нариман Мирзабегович Багъичевдин гьюрмат уьбхбаз бахш дапIну, волейболиан талитар кIули гъухну.

 

Талитар ачмиш апIури, Хив райондин глава Ярмет Ярметовди къайд гъапIганси, учв Нариман Багъичев аьхю аьшкьниинди волейбол уйнамиш апIрур вуйи.
«Нариман Мирзабегович гъи райондиъ гьич сар касдинра кIваълан душну адрувалиин узу инанмиш вуза. Фицики думу, дугъриданра, лайикьлу духтир вуйи. Хайлин йисари райондин агьалйирин сагъламвал уьбхбан рякъюъ баркаллу зегьмет зигувалиинди, дугъу ихь юкIвариъ аку шил гъибтну.

Нариман Мирзабеговичди «Олимп» командайин дахилнаъди волейбол уйнамиш апIури гъахьиваликан ухьуз ужуди аьгъяхьуз. Дугъан гьюрмат уьбхюри, гъи ухьу му талитаризра уч духьнахьа.
Улупнайи талитар гъахували жямяаьтлугъдин арайиъ волейбол артмиш апIбаъ, спортдин му жюрейиан уйнамишар гъахбаан жигьиларин устадвал за апIбаъ анжагъ ужуб шил гъибтди. Волейбол уйнамиш апIрудариз ва тамашичйириз маракьлу уйнамишар ишри!

Хъа талитар Аьхю Гъалибвализ бахш апIбахъди аьлакьалуди пуз ккундузузки, гъит ихь наслариз дяви дярябкъри! Дюн’я ислягь ибшри!» – аьлава гъапIну Ярмет Ярметовди.
Маракьлуди кIули гъушу талитарин натижайиъ гъалибвалин сабпи йишваз ГъуштIил гъулан жигьиларин команда, 2-пи йишваз – Хиварин, 3-пи йишваз – Асккан Ярккарин, хъа 4-пи йишваз – Хирччварин волейболин командйир лайикьлу гъахьну. Гъалибчйир тялукь дережайин дипломариинди ва пулин пешкешариинди лишанлу гъапIну.

Дурариланра савайи, волейбол уйнамиш апIбаан заан устадвал улупу кIул’инди волейболистарра пулин пешкешариинди лишанлу гъапIнийи. Дурарин арайиъ Артур Нурмягьямедов (ГъуштIил), Имамудин Гья-санов (Кашкент), Гьяйдар Исмяилов (Асккан Яракк), Пирмягьмад Къубачев (Олимп) ва Фарид Ягъибегов (Асккан АрхъитI) а.