Улихьна йигъари Табасаран райондиъ, Ватандин Аьхю дявдиъ Гъалибвал гъадабгъну 76 йис хьпаз бахш дапIну, спортдин жюрбежюр жюрйириан Табасаран райондин глава Мягьямед Къурбановдин пешкешариз вуйи серенжемар кIули гъушну. Спортдин гьарсаб жюрейиан вуйи талитариъ райондин вари гъуларин вакилари лап аьхю аьшкьниинди иштирак’вал гъапIнийи.
ММА
Ватандин Аьхю дявдиъ Гъалибвал гъадабгъну 76 йис хьпаз бахш дапIнайи спортдин серенжемар Табасаран райондин Хючна гъулаъ ерлешмиш дубхьнайи, Кьалухъ Мирзайин ччвурнахъ хъайи спорткомплексдиъ мектебариъ урхурайидарин арайиъ ММА жюрейин спортдиан талитар гъахбалан ккергъну. Му йигъан райондин спортдин вари мектебариан 25 гъагъишнан категорйириъ кIули гъуху талитариъ 95 спортсмен иштирак гъахьну. ММА-йин талитариъ иштирак гъахьи спортсменарикан 75 спортсменди пешкешнан йишвар гъадагъну.
ВОЛЕЙБОЛ
Волейболиан вуйи талитарра Кьалухъ Мирзайин ччвурнахъ хъайи спорткомплексдиъ кIули гъушну. Талитариъ иштирак хьуз ра-йондин жюрбежюр гъулариан 18 командайи чпин разивал улупнийи. 4 дестейиз жара дапIнайи командйирикан, гьарсаб дестейиъ гъалиб гъахьи са-саб команда (Урзигъ, Бухьнагъ, Гьесихъ ва Ханак гъуларин командйир) полуфинализ удучIвнийи. Финалин уйнамишарин натижайиъ Урзигъ гъулан командайи 1-пи йишв, Букьнагъ гъулан командайи – 2-пи йишв гъазанмиш гъапIну. Шубубпи йишван сагьиб Гьесихъ гъулан команда гъабхну.
ХИЛ ККИПУБ
Аьхиримжи вахтна спортдин му жюре райондиъ ужуди артмиш шула. Майдин эвелариъ кIули гъушу талитариан 70 кило гъагъ айи спортсменарин арайиъ гьамусдиз 5 ражари райондин чемпион духьнайи ТIюрягъ гъулан агьали Вагиф Гьяжикъайибов, Исамудин Аьлирзаевдиин гъалибвал гъадабгъну, 1-пи йишван сагьиб гъахьну. Хъа НичIрас гъулан агьали Сергей Бабаевди 3-пи йишв гъибисну. 79 кило гъагъ айи спортсменарин арайиъ 1-пи йишв Аким Аьбдуллаевди (ЦIурутIил гъул), 2-пи йишв Салман Мягьматовди (Гурхун гъул) ва 3-пи йишв Мурад Къурбанялиевди (Кюрягъ гъул) гъадагъну.
ГИРЯ ЗА АПIУБ
Му жюрейин спортра ихь халкьдин арайиъ адлу спорт ву. Дупну ккундуки, гирйир за апIбаан дюн’яйиъ варитIан гужли кас ихь ватанагьли Рустам Бегерин ву. Гьелелиг думу ккагъуз шлу кас адар.
Хъа магьа ихь райондиъра спортдин му жюрейиан талитар кIули гъухну. Натижайиъ Хючнаан вуйи Заур Мусаевди 1-пи, НичIрасан вуйи Беслан Мягьямедовди 2-пи ва Гюгь-рягъян вуйи Эменуллагь Рашидовди 3-пи йишвар гъидисну.
ЖАРГЪУБ
Ватандин Аьхю дявдиъ Гъалибвал гъадабгъну 76 йис хьпаз бахш дапIнайи спортдин серенжемарин дахилнаъди 1200 метрин манзилназ жаргъбаан вуйи талитарра кIули гъашну. Думу талитариъ ра-йондин гъулариан 15 кас иштирак гъахьну. Улупнайи манзилнаъ варитIан кIубанди дажаргъну, финишдиз сарпирди хъуркьур Гьюгьрягъян вуйи Сабир Матаев ву. Хъа кьюрпирди ва шубурпирди хъуркьдар Дагъниан вуйи Закир Аьбдуллаев ва НичIрасан вуйи Асгьяб Аьлиев гъахьну.
СТОЛИИН АПIРУ ТЕННИС
Столиин теннис апIбанра талитариъ иштирак хьуз ра-йондин 15 гъул’ан 23 касди чпин аьрзйир тувнийи. Натижайиъ 1-пи ва 2-пи йишвар заан Ягъдигъ гъулан агьалйир вуйи Аьлимурад Къадировдина Аьли Гьясанбеговди гъадагъну, хъа 3-пи йишван сагьиб Дарвагъ гъулан вакил Самбур Кьягьриманов гъахьну.
ШАШКЙИР
Шашкйир уйнамиш апIбан гьякьнаан улхуруш, Табасаран райондиан спортдин му жюрейиин машгъул духьнайи кIубан касарикан саб аьхю макьала бикIуз шулу. Хючнаан вуйи Исмяил Исмяилов ва НичIрасан вуйи Гьяшим Хайирбегов шашкйир апIбаан швнуб-саб ражари республикайин чемпионар духьнайиваликан варидиз мялум ву. Магьа гьаму ражарира райондиъ тешкил дапIнайи спортдин серенжемариъ дурар иштирак гъахьну. Шашкйириан вуйи талитар Хючнаарин культурайин хулаъ кIулиъ гъушну. Талитариъ 14 кас иштирак гъахьну.
Вари 14 кас сар-сарихъди талитнаъ учIвбан кьяляхъ, Исмяил Исмяилов ва Гьяшим Хайирбегов имбуну 12 иштиракчйирихьан ккагъуз гъабхьундар. Хъа дурарин нубатнан партияйин натижа кIули-кIулинуб гъабхьиган, гъалибчи, жара улупбариз лигну, гъядягъну. Натижайиъ Гьяшим Хайирбеговди сабпи, Исмяил Исмяилов кьюбпи ва Темир Кьасимовди шубубпи йишвар гъадагъну.
ШАХМАТАР
Майдин 5-пи йигъан Табасаран райондиъ шахматарианра турнир кIули гъубшну. Талитарин 24 иштиракчйирин арайиъ улихьна йисари шахматариан райондин чемпионар гъахьи Гъазанфер Ханялиев, Зиявудин Хайирбегов ва Исмяил Исмяиловра айи.
Турнирин натижайиъ, вари 9 туриъ гъалиб духьну, 1-пи йишв НичIрасаран кьялан мектебдин 4-пи классдиъ урхурайи Мягьямед Мукаиловди гъазанмиш гъапIну. Кьюбпи йишван сагьиб ЧвултIан вуйи Замир Гюлев гъахьну, хъа шубубпи йишв НичIрас гъулан сарсан агьалийи – Арсен Хайирбеговди гъадабгъну.
Къайд дапIну ккундуки, улихьнаси Мягьямед Мукаилов, Мягьячгъалайиъ кIули гъубшу, вари халкьарин гроссмейстер Жакай Жакаевдин кубок бадали вуйи талитариъ иштирак духьну, чан яшарин спортсменарин арайиъ сарпир гъахьну. Му бажаранлу баликан яркьуди мялуматар учу газатдин гъюру нумрйирикан сабдиъ тувдича.
ФУТБОЛ
Ватандин Аьхю дявдиъ Гъалибвал гъадабгъну 76-пи йис хьпаз бахш вуди райондиъ кIули гъабшу спортдин серенжемарин арайиъ варитIан маракьлудар футболиан тешкил дапIнайи талитар гъахьну. Эвелиан талитариъ иштирак хьуз райондин гъулариан 16 футболин командйири аьрзйир тувнийи. Дурумлу талитариъ 1-пи йишв СиртIич гъулан командайи, 2-пи йишван сагьиб Заан Гюгьрягъ гъулан командайи, 3-пи йишв Гурихъ гъулан командайи гъазанмиш гъапIну.
