Газатдин 18-пи нумрайиъ учу Табасаран райондин глава Мягьямед Къурбановдин пешкешариз спортдин жюрбежюр жюрйириан тешкил гъапIу турнирин дахилнаъди 5-пи майдиъ кIули гъубшу шахматариан талитарикан гъибикIнийча. Думу талитариъ, 1-пи йишв Табасаран райондин НичIрас гъулан кьялан мектебдин 4-пи классдиъ урхурайи Мягьямед Мукаиловди (шиклиъ) гъазанмиш гъапIнийи. Гъи газат урхурайидар му бажаранлу балихъди багахьди таниш апIурза.
Мягьямед 5 йис гъабхьихъан мина шахматариин машгъул духьна. Эвелиан дугъу чан аьхюну гъардшихъан шахматар апIуз гъудубгъну. Мектебдиъ мялим Зиявудин Хайирбеговдин хиликкди шахматарин кружокдиз гъягъюри, бали чан юкIв али спортдиан аьгъювалар гъадагъувал давам гъапIну.
БицIи шахматистдин хъуркьуваларикан узуз дугъан адаш Ризван Мукаиловди ктибтнийи. Дугъу гъапиганси, Мягьямед 2-пи классдиъ урхурайи вахтнахъан мина шахматариан вуйи жюрбежюр турнирариъ иштирак шула.
«Мягьямед иштирак гъахьи сабпи шахматарин аьхю турнир – 2019-пи йисан 29-пи майдиъ райондин центр Хючна гъулаъ вари дюн’яйин бицIидарин Йигъаз бахш вуди тешкил дапIнайи талитар вуйи. Турнириз думу чан мялим Зиявудин Хайирбеговдихъди гъушнийи.
Турнириъ чахъди талитнаъ учIвнайирихьан саб партияйиъ магълуб хьпаз лигну, Мягьямед кьюбпи йишван сагьиб гъахьнийи ва му хъуркьуваллин гизаф разиди вуйи, фицики чан уьмриъ сабпи ражари мицдар аьхю талитариъ иштирак’вал гъапIнийи.
Дидин кьяляхъ узу думу кьюб ражари Мягьячгъалайиъ кIули гъушу шахматарин турнираризра хъади гъушунза. Сабпи ражари вуйи турнириъ, 5 партияйин талитнаъ сабпи партйириъ магълуб духьну, имбуну партйириъ гъалиб гъахьнушра, турнирин шартIариинди дугъаз пешкешнан йишв гъабхьундайи. Хъа сач кIуруш, коронавирусдихъди вуйи аьгьвалат гъагъиб вуйивализ лигну, думу наанкIа гьаундарза»,
– ктибтнийи шахматистдин адашди.
Хъа цци 27-пи апрелиъ Мягьчгъалайиъ кьюбпи ражари Жакай Жакаевдин хьадукран Кубокдиз вуйи шахматарин турнир кIули гъубшну. ИкибаштIан, дидиъ республикайин вари районариан 80-тIан артухъ бицIи шахматистарин дахилнаъди Мягьямедра иштирак гъахьну.
«Му турнириъ чав айи дестейин вари иштиракчйир гъазанмиш гъапIу очкйириинди кьяляхъ гъитну, думу 1-пи йишван сагьиб гъахьну. Дидин кьяляхъ, арайиан сад йигъ адапIну, Краснодар крайин шахматарин Федерацияйи гьялакди уйнамиш дапIну ккуни шахматариан тешкил дапIнайи, онлайн жюрейиинди гъабхру вари халкьарин арайиъ вуйи рягьимлувалин турнир кIули гъубшну. Душваъра чан яшарин дестейин иштиракчйирихъди вуйи талитнаъ саб партияйин кьяляхъ хъахъбаз лигну, Мягьямед кьюбпи йи-шван сагьиб гъахьну»,
– аьлава гъапIну Ризван Мукаиловди.
Макьалайин аьхириъ къайд апIуз ккундузузки, НичIрасарин гъул шашкйир ва шахматар уйнамиш апIбан спорт ужуди артмиш дубхьнайи гъул ву (узу гьадму гъул’ан вуза, ва гъулан гьякьикьат ужуди аьгъязуз). Шашкйир уйнамиш апIбан спортдиан 7 ражари дагъустандин чемпион гъахьи Гьяшим Хайирбеговра НичIрасан ву. Думу, шашкйирианси, шахматар уйнамиш апIбаанра ужур устад ву. Гьадгъан рякъ гъулан бицIидари давам апIура.
«Табасарандин нурар» газатдин журналистари Мягьямед Мукаиловдиз хъанара артухъ хъуркьувалар ккун ва дугъаз редакцияйиз теклиф апIурача.
