Гьаму йигъари Дагъустандин Верховный суддиъ Урусатдин ватандаш К.Г. Аьликберовдин ва Азербайжан Республикайин вакил А.А. Исмяиловдин гьякьнаан уголовный делойиз гъилигну. Думу касари Урусатдиз аьхю кьадарниинди опий – наркотик хури ва думу масу туври гъахьну.
РД-йин Верховный суддин пресс-гъуллугънаан учуз туву мялуматариинди, силисар гъахру вахтна ашкар гъабхьиганси, К.Аьликберовна А. Исмяилов 2016-пи йисан контрабандайиинди наркотикар хпан ва дурар масу тувбан ляхнихъ хъюгъну. Дурари наркотикар къанунсузди Азербайжандиан Таможняйин союздин сяргьятарилан мина Урусатдиз хури гъахьну. Жиниди ихь гьюкуматдиз наркотикар хурайидари чпин ролар гьамци пай гъапIнийи: А. Исмяиловди опий-наркотик таможняйин сяргьятарилан Дагъустандиз алдабгъувал чаина гъадабгънийи, хъа К. Аьликберов, наркотик масу гъадабгърудар агури, думу Дагъустандиъ масу тувбахъан жавабдар вуйи.
«Гъубшу йисан А. Исмяиловди Дагъустандиз саки 3 килойихьна гъагъ ади опий-наркотик гъабхну. Наркотикдин сурсат дугъу, таможняйин ва сяргьятар уьрхру органарин гюзчивал гъабхру гъуллугъчйириз дибрихъруси, чан машиндин багажникдин гъирагъдиккди дярябкъруси кибирхну ккивну, гьитIибкIну. Дагъустандиъ наркотик Г.Аьликберовдихьна тувну, А.Исмяилов чан ватандиз хъадакну гъушну. Кьандиси дугъу хъана гьациб наркотик, амма му ражари 5577,26 грамм ади, Дагъустандиз хьади гъюз рякъюъ учIвру»,
— къайд гъапIнийи РД-йин Верховный суддин пресс-гъуллугънаан.
Кьюбпи ражари наркодиллерарин къанунсуз гьяракат кIулиз удубчIвундар. Гьюкуматдин томожняйиин гьяракатнанна агбан серенжемар гъахурайи вахтна, Урусатдин таможняйин вакилариз наркотик жин дапIнайиваликан хабар шулу. Дурари машин дикъатлуди ахтармиш апIуз хъюгъру ва таможняйин гъуллугъчйириз 5 килона 600 граммдихьна опий-наркотик бихъуру.
Мидланра гъайри, А. Исмяиловди чаз таниш дишагьли, дугъак гъагъи уьзур кайиваликан хабар ашра, уьзур сагъ апIбан бадали, чав масу туврайи дарман чарасуз вуди ишлетмиш дапIну ккунивалихъ хъугъуз гъитну, думу наркотикарик каъру. Сифте дугъу дишагьлийиз наркотикар пулсузди туври гъахьну, аьхирки, наркотикарин асиллувалиъ ахъу дишагьли А.Исмяиловдихьан аьхю кьадар наркотикар пулихъ масу гъадагъуз мажбур шулу.
Дагъустан Республикайин Верховный судди наркотикар масу туври гъахьи кьюрид жиларра тахсиркрар вуйиб тасдикь гъапIну. А.А Исмяиловдиз 400 агъзур манатдин журум ва 18 йисан дустагъ апIбан, хъа К.Г. Аьликберовдиз 250 агъзур манатдин журум ва 15 йисан дустагъ апIбан жаза гьадабтIну. Дурари кьюридра дустагъдиъ ижми къайдайиъди жаза зигиди.
