Курортариз гъягъру мани фасил улубкьна, амма COVID-19 инфекцияйи инсанарин планариъ дигиш’валар тIаъну. Гизаф инсанарихьан харижи мани уьлкйириз, марцци гьюлерихъна гъягъюз шуладар, гьаддиз дурарикан гизафдари ихь уьлкейин туриствалин шагьрариъ ва мани регионариъ рягьятвал гъадабгъуз къарарар адагъну. Дугъриданра, туристар гъювали Дагъустандин экономикайин аьгьвалатназ ужуб терефназди тясир апIуйи, хъа, гьяйифки, республикайин инфраструктура туристар кьабул апIуз бегьемди гьязурди адар. Хъа Каспий гьюликан ва ихь республикайиъ дидин гъирагъарин марцциваликан затра улхурадарза.
Гьаму йигъари Роспотребнадзорин региондин управлениейин вакилари Дагъустандин меркез вуйи Мягьячгъала шагьриъ Каспий гьюлин гъирагъарихъ рягьятвал гъадабгъувал ва гьюлик жикIувал инсандиз хатIа айидарси гьисаб гъапIну. Мидин гьякьнаан Роспотребнадзорин региондин управлениейи Мягьячгъалайиъ пляжарихъ жикIувализ къадагъа апIбан къарар гьязур апIура.
Роспотребнадзорин пишекрари Каспий гьюлин гъирагъарихъ штун марццивал ахтармиш апIбан серенжемар кIули гъухну. Натижайиъ гьюлин шид кьабул дапIнайи нормйиртIан лап хайлин чиркинди айивал ашкар гъабхьну.
Гьамусяаьт республикайиъ, шагьрарин гъираргъарихъ хъайидарра кади, 22 пляж гьяракатнаъ а. Дурари 9,5км йишв бисура. Сабишв’инди думу пляжарихъ 162,2 агъзур касдихьан рягьятвал гъадабгъуз шулу. Хъа, гьяйиф…
«Мягьячгъала, Каспийск, Дербент, Дагъустандин Огни шагьрарин гъирагъарихъ гьюлин штук фунин рудрарин палочкайин учIру инфекцйирин дестейин бактерйир улупнайи норматIан артухъди ашкар духьна. Гьар йисан гьюлин шту холерайиз багахь вуйи вибрионарин бактерйир арайиз хури шулу. Дурари фунин учIру инфекцйир арайиз хуру. Гьюлин шид чиркин дубхьнайивалин асас сабеб шагьрарин канализацияйин ва жара чиркин штар марцц дарапIди Каспий гьюлизди деетурайивал ву. Мидланра гъайри, шагьрарин ва районарин администрацйирин главйир чпин дахилнаъ айи пляжарин аьтрафар кьабул дапIнайи нормйирин тIалабарихьна хуз гьялак шуладар, гъумран ва гьюлин штун ери ахтармиш апIру лабораторияйин гюзчивал тешкил дапIнадар, гьюлин шид ишлетмиш апIру йишварин сяргьятар жара дапIну, тасдикь дапIнадар, ва гьацира жара себебер ктухуз шулу»,
— къайд гъапIнийи Роспотребнадзорин региондин управлениейиан.
РФ-дин Роспотребнадзорин кIулиъ айи Светлана Радионовайин гафариинди, Дербент, Буйнагъск, Дагъустандин Огни шагьрариъ канализацияйин чиркишнар марцц апIру гъурулушар затра адар, хъа Мягьячгъалайиъ, Хасавюртдиъ, Къизилюртдиъ, Къизлариъ ва Кьибла-Сухокумскдиъ айи гъурулушарихьан вари чиркишнар марцц апIуз удукьурадар.
2018-2020-пи йисари Роспотребнадзори, табиаьт уьбхбан къанундин тIалабар чIур апIувализ лигну, республикайин швнуб-саб администрацияйиин 3 миллиондихьна журумар иливну. Каспий гьюл чиркин апIурайи гъурулушар къайдайиз хпан гьякьнаан 26 представление хътаъну. Амма Дагъустандиъ гьюлин шид гьеле марцц шлубсиб гьял дар. Гьаци вушра, туристар республикайиз гъюра, ва дурар гьюлихьинди ваъ, хъа ихь успахьи дагъларин терефназди илтIикIур кIури, миж кивурхьа.
