Улихьнаси Дагъустандин гьюкуматдин китабарин чапханайиъ табасаран чIалниинди «Худайин пешкеш» ччвур али цIийи китаб удубчIвну. 

 

Думу машгьур табасаран шаир, мялим ва фронтовик Ибрагьим Шагьмардановдин гъядягънайи эсерарикан ибарат вуйи гъварч ву. Китабдиъ жюрбежюр йисари автори гъидикIу шиърар ва поэмйир тувна. Китаб йирхьуб паянакан ибарат дубхьна: шиърарикан вуйи «Гьевеслу рюгьнан гьяракат», «Дявдин рякъяр», «Хлинццар кайи шадвал», «Уж’валин тумар», «Сефил аьлхъюб» паяр ва «Поэмйир» сифте табасаран чIалниинди, хъасин урус чIалназ таржума дапIну тувна. Дупну ккундуки, цIийи китабдиъ И.Шагьмардановдин вари поэмйир – «Мюгьюббатдин гими», «Жилихъди сюгьбат», «Нарин-гъала», «Уьзденарин женг» ва «Нянатлу накьв» – саб жилднаккди тувна.

Китабдин сабсан хусусивал гьаддиъ аки, И. Шагьмардановдин эсерар урус чIалниинди чапдиан удучIвури сабпи раж ву, ва цIийи китабди машгьур табасаран шаирин дерин мянайин ва художествойин жигьатнааан заан кьиматлувал айи уткан эсерарихъди имбу халкьарин вакиларизра таниш хьуз мумкинвал тувди.

КIваин апIурача, аьхиримжи йисари И.Шагьмардановдин кьюбсан китаб чапдиан удучIвну: 2015-пи йисан шиърарин китаб «ТIибх, йиз мяъли» ва 2019-пи йисан «Дагълариъ тIурфан» – ихтилатарин ва публицистикайин макьалйирин гъварч.