Гуниб райондиъ тарихдикан вуйи «Аманат» ччвур тувнайи кино адабгъура. Дина миллетарин ляхнариз лигру Федералин агентствойин кIули айи Игорь Баринов ва РД-йин милли политикайин ва динарин ляхнариз лигру министр Энрик Муслимов гъушну.

 

Му фильм XIX аьсрин сабпи гьацIаъ Урусатдин, гьадму гьисабнаан Дагъустандин, тарихдиъ гъахьи гьядисйирикан ва имам Шамилин аьхюну бай Жамалудиндин ва Лиза Оленинайин мюгьюббатдикан ву.

Тарихдиан мялум ву-йиси, имам Шамилин политикайин йисир гъахьи дугъан аьхюну бай Жамалудин бицIиди имиди Кавказдиан Санкт-Петербургдиз гъухну. Император Николай I тербияйикк аьхю гъахьи Жамалудинди дворянарин образование гъадабгъну. Гьадмуган дугъан, вари Урусатдихьнаси, генералин риш Елизавета Оленинайихьнара ккунивал ачмиш гъабхьну, ва дагълу бали дугъахъди эвленмиш хьуз кьаст гъапIну. Хъа гьадму вахтна Жамалудиндин гага Шамили Николай Сарпирихъди дяви гъабхури, бай кьяляхъ хуз чарйир агури гъахьну.

Рябкъру гьялариан, тарихдин бинайиин асасламиш вуйи кинойин сюжет лап маракьлуб ву. Дидиз аьхю аьшкьниинди ккилигидихьа.

Улихьна Москвайин миллетарин Хулаъ дагъустандин духтрари коронавирусдин тIягъвнихъди женг гъабхури сад йис тамам хьпаз бахш дапIнайи «Сабпи гъала» кIуру документальный кинойин презентация кIули гъубшну.

Мушваз дагъустандин элугъливалин тешкилатдин вакилар, духтрар, журналистар, киноиндустрияйин вакилар ва гьацира волонтерарна медуниверситетарин студентар уч гъахьну.

Кинофильмдин продюсер Исрафил Исрафиловдин гафариинди, «Сабпи гъала» – коронавирусдин тIягъюн ккебгъхъанмина «уьру зонайиъ» ляхин апIурайи духтрарин, фельдшерарин, санитаркйирин ва волонтерарин уьмрикан, чпин пишекарвалин буржи тамам апIури, дурариз фицдар читинвалар аьх апIуб алабхънуш, гьаддикан ву. Съемкйир Мягьячгъалайин 1-пи нумрайин больницайиъ кIули гъушну.