Цци апрелиан майдиз Урусатдин Федералин налогарин гъуллугъну 2021-пи йисаз чапдиан удучIву налогарикан дидикIнайи китабарин арайиъ конкурс тешкил гъапIну.
Конкурсдиъ Федералин налогарин гъуллугънан Дагъустандин управлениейин налог туврайидарихъди ляхин гъабхру отделин начальникдин заместитель, Табасаран райондин СиртIич гъулан агьали Багьаутдин Аьлиевдира чан «Харадж налогдилан жилиина вуйи налогдихьна» («От хараджа до налога на землю») китаб хьади иштирак гъахьну.
Конкурсдиъ 4 номинацияйиан Урусатдин регионариъ гъидикIу 53 китаб иштирак гъахьнийи: «Урусатдин Федералин налогарин гъуллугънан тарих» номинацияйиъ – 11 китаб, «БицIидариз налогарикан» номинацияйиъ – 6 китаб, «Китабар» номинацияйиъ – 16 китаб ва «Налогарин администрирование апIувал» номинацияйиъ – 20 китаб. Ихь ватанагьли «Урусатдин Федералин налогарин гъуллугънан тарих» номинацияйиан гъалиб гъахьну.
28-пи июли Урусатдин Федералин налогарин гъуллугънан кьялан аппаратдиъ ФНС-дин кIулиъ айи Даниил Егоров, дугъан заместитель Светлана Бондарчук иштирак духьну конкурсдин гъалибчйириз пешкешар тувну (шиклиъ).
«Табасарандин нурар» газатдин терефнаан ихь ватанагьлийиз му гъалибвал тебрик ва хъанара артухъ хъуркьувалар ккун апIурача.
