1966-пи йисан Табасарандиъ зарбди жилар гъутIурччвиган ва инсанарин хулариз, ужагъариз аьхю зарар гъабхьиган, Хив райондин ЧIвалакк гъул сабхилди Дербент райондин Рубас гъулаз кючмиш гъабхьнийи. Гьаддихъан мина ЧIвалакк фужкIа яшамиш шули имдар.
Цци гъуландарин жягьтлувалиинди ва дурарин хусуси дакьатарихъ ЧIвалккарин гъулан ругариин али йирси дубхьнайи бицIи мист рас дапIну, цIийи алапIну. Тикилиш’валин ляхнар ккудукIиган, 7-пи августди чIвалккари чпин гъулан Йигъ мевлюд жюрейиинди къайд гъапIну.
Му мажлиснан гьякьнаан учуз мялуматар Хив райондин имамарин советдин председатель Шябан Салигьовди тувну.
Дугъан гафариинди, кьюб ваз улихьна, ЧIвалккарин гъулан багхьан тина рякъюъди гъягъюрайириз дугъаз йирси мистан улихь инсанар гъяркънийи.
Багахьна душну, гаф-чIал апIбан кьяляхъ, Шябан Салигьовди чIвалккариз, рас апIбан ляхнар ккудукIиган, дурарин натижа йивури, сатIиди мажлис тешкил апIбан теклиф дивнийи. ЧIвалккар рази гъахьнийи, ва дурари 7-пи августди гъулан Йигъ тешкил апIуз йикьрар гъапIнийи.
«Арайиан кьюб ваз удубчIвбан кьяляхъ, улихьна йигъари, 70-80 кас уч духьну, ЧIвалккарин гъулаъ цIийи алапIу мистаъ аьхю мажлис кIули гъубшну. Мина Рубасдиан вуйи чIвалккарси, багарихь хьайи гъунши гъулариан агъсакъларра гъафнийи. Серенжемдиъ райондин имамарра иштирак гъахьнийи, гьадрарин арайиъ Рубас гъулан имамра айи. Гьаму жюрейин мажлис му мистаъ гьар йисан кIулиъ гъабхуз мясляаьт адабгъунча», – аьлава гъапIнийи Шябан Салигьовди.
ФужкIа яшамиш даршулайи гъулаъ мист цIийи алапIиган, дидиз хъайивалра апIури, дидин айитI марццишинра уьбхюри ккунду. Му ляхин чан кIул’ина Шябан Салигьовди гъибисну, хъа дугъаз кюмекчиди Зилдикк гъулан имам хьиди.
Табасаран гъуларин жямяаьтлугъ уьмриъ мистан эгьемият гизаф аьхюб ву. Думу неинки Аллагьдин хал, хъа гьацира инсанар ужувлан, хайирнан ляхнариин сатIи апIурайи йишв ву. Умуд кивурхьа, мист чIиви апIували гележегдиъ ЧIвалакк гъулра жанлу хьуз кюмек тувур.
