РД-йин правительствойин председатель Аьбдулпятягь Амирхановди гьюкуматдин образованиейин тешкилатарин гъуллугъчйирин зегьметназ кьимат тувбан гьякьнаан вуйи Къайдайиъ дигиш’валар тIаъбан къарарниин къул гъизигну.
Думу документдиз асас вуди, гьаму йисан 1-пи сентябрилан башламиш дапIну, мялимарин вазлин дуллугъ 3 агъзур манатдиинди за хьибди. Мисал вуди тевурхьа: эгер улихьди категория адру мялимдин маважиб 12792 манат вуйиш, гьамус 15792 манат хьибди. Кьялан гьисабариинди, думу кьадарну 23,4% тяйин апIура.
Гьаму къарар РД-йин образование-йин ва илимдин министерствойин дахилнаъ айи образованиейин тешкилатариз кайиб ву. Гьаддихъди сабси муниципалин образованйирин улихьра гьаму жюрейин къайдайин актар муниципалин дережайиъдира кьабул апIувалин теклифар дивна.
Улупнайи къарарин гьякьнаан Хив райондин Лик’арин асас аьгъювалар тувбан мектебдин директорин заместитель Алина Рамалдановайи (шиклиъ) чан фикрар ачухъ гъапIну.
– Гьелбетда, гьаму дигиш’валариин гьарсар мялим рази ву. Хъа гьадму саб вахтна муниципалин дережйириъди тялукь актар кьабул апIбан табшуругъар айивали фикрариккра ккитра.
Гъи Хив райондин мектебариъ лихурайи асас пай мялимарин яшар 50-60 йис ву. КIул’инди гьарсаб мектеб гъадабгъишра, жигьил пишекрар тIубариинди ктухуз шулу. Мектеб ккудубкIу живанар мялимар гьязур апIру вузариз урхуз гъягъюра, амма гъудуркьу пишекрар гъахьиган, мектебариз кьяляхъ лихуз гъюрадар. Мялимарди гъафидарра кьаназ ктисурадар. Мисалназ, ккудубшу йисан узу лихурайи мектебдиан кьюр жигьил пишекрар чпин гележег ккабалгуз Урусатдин кафари шагьрариз удучIвну гъушну. Гъавриъра хьуб читин дар: мялимди гъадабгъурайи 10-15 агъзур манат вазлиз бицIидарра айи хизандин харжариз фу вухъа?! Йишвариин мялимдин зегьметназ лайикь кьимат туври гъабхьиш, белки, жигьил пишекрарира йишвариин дурум йивур ва гъулариъ мялимарин кьитвалин месэла гьял шул, – гъапну дугъу.
Дарпиди гъитуз шулдарзухьан: арайиз дуфнайи тялукь аьгьвалатнаъ гъи райондин мектебариъ хайлин пишекрариз игьтияж а. Пишекрар адрувалиан саб жерге дарсар йишв’ин али, гьадму саб вахтна бегьемди сяътар адру мялимари кивра. Гьаци гъи образованиейин ери ис абхърайивалин месэлара учIруди дийибгъна. Саб жерге пишекрариз ихь уьлкейиъ заан кьимат тувра, хъа фунур пишекарра уьмрин яркьу рякъюз гьязур апIурайи мялимдихьна мициб янашмиш’вал дюз вуйинхъа?! Ухькан гьарсар уьмриз гьязур гъапIу мектебдиз, МЯЛИМдиз лайикьлу кьимат тувуз аьгъю хьайизкьан, ухьу бахтлу гележегдихъна гъювалра суалди гъубзбан къурху а….
