Сечкйир гъахру вахт улубкьайиз саб вазтIан цIиб йигъар гъузра. Учу улихьна мялум гъапIганси, гьаму йисан сечкйир шубуд йигъан кIули гъягъиди – сентябрин 17-пи, 18-пи, 19-пи йигъари. Экспертари ва политикайин цирклиъ ляхин апIурайи гъуллугъчйири ццийин сечкйир тарихдиъ варитIан гизаф конкуренция айидар шлуваликан гъапну. Сечкйир кIули гъахбиин шубуд йигъандин арайиъ видеойин гюзчивал гъабхури, 100000 видеокамерайи ляхин апIиди. Думу кьадар улихьна ражари гъуху сечкйириъ ишлетмиш гъапIу видеокамерйиртIан 2,5 ражари артухъ ву. РД-йин Избиркомдиан туврайи мялуматариинди, сечмиш апIбан гьарсаб участокдиъ 2-3 камера дивди. Гюзчивал йишвнура, йигънура 60 сяаьтна гъабхиди.
«2021-пи йисандин сечкйирин гюзчивал гъабхру региондин жямяаьтлугъ Штабдин вазифа – сечкйирин ляхин гъабхру вахтна къанундин ихтиярар тямин апIувал ву. Учу ватандаш жямяаьтлугъдин институтарихъди ва политикайин тешкилатарихъди жямяаьтлугъ гюзчивал гъабхурайи йишвариъра гюзчивал гъабхбан, гьадму гьисабнаъди видеойин гъюзчивал гъабхбан гьякьнаанра, йикьрар гъийитIунча. Гьар гъюру нубатнан сечкйирин кампанияйихъди конкуренцияйин дережара за шула», – гъапну РД-йин Жямяаьтлугъ палатайин председателин заместитель, сечкйир гъахбиин гюзчивал тешкил апIру региондин жямяаьтлугъ Штабдин кIулиъ айи Буньямин Мягьямедовди.
Гьаму йисан Дагъустандиъ, Госдумайиз сечкйириъ иштирак хьпан бадали, 27 кандидатди регистрация дапIна – саб мандат айи сечкйирин гьарсаб округдиз 9 кандидат улупна. Дидин гьякьнаан Избиркомдин председатели мялумат тувра.
«Дагъустан Республикайин сечкйирин комиссияйи Урусатдин Федерацияйин Государствойин Думайиз Дагъустан Республикайин аьтрафариин саб мандат айи округариъ – саб мандат айи 10-пи нумрайин сечкйирин Кафари округдиъ, саб мандат айи 11-пи нумрайин сечкйирин Кьялан округдиъ, саб мандат айи 12-пи нумрайин сечкйирин Кьибла округдиъ – депутатвализ кандидатар регистрация дапIну ккудубкIну», – дупна Дагъустандин сечкйирин комиссияйин сайтдиъ.
Кандидатар политикайин 14 партияйи улупнайидар ву: «Саб вуйи Урусат», «Гьякьлу Урусат дугъривалихъанди», «КПРФ», «Ватан», «ЛДПР», «ЦIийи инсанар, «Яблоко», «Яшайишдин гьякьлувалихъанди вуйи Урусатдин пенсионерарин партия», «Урусатдин экологияйин «Чрудар» партия», «Чру альтернатива», «Ватандаш’валин платформа», «Урусатдин азадвалин ва гьякьлувалин партия», «»Урусатдин коммунистар» Коммунистарин партия».
Гьаму зиихъ ктуху гьарсаб партия сечкйирин гьарсаб округдиз са-сар кандидат улупну.
РД-йин Избиркомди 2021-пи йисан 16-пи августдиъ, 2021-пи йисан 19-пи сентябриъ Дагъустан Республикайин ургубпи дих апIбан Халкьдин Собраниейиз депутатар ктагъбан сечкйириъ сесер тувру бюллетендиъ сечкйирин объединенйирин ччвурар ва лишнар тIаъбан къайда аьгъю апIбан бадали, тупут ипну.
Тупут ипбан натижйириз дилигну, сечкйирин бюллетендиъ ччвурар ва лишнар гьаму жюрейиинди тувди:
№ 1 – ЛДПР-Урусатдин либералинна демократвалин партия;
№ 2 – «Саб вуйи Урусат» – Вариурусатдин политикайин партия;
№ 3 – «Гьякьлу Урусат – Ватанперверар – дюзвалихъан» политикайин социалист партия;
№ 4 – «Партия РОСТА» Вариурусатдин политикайин партия;
№ 5 – «Урусатдин Федерацияйин Коммунистарин партия» политикайин партия.
