Урусатдиъ сабпи сентябрихъан саб жерге цIийивалар кьувватнаъ учIвра.
Гьамусдихъантина бицIириз хъайивал апIурайи вахтнан больничный пул миржид йис хьайизкьан тувди. Дидин кьадарра, страховой стаждикан асиллу дарди, кьялан маважибдин гьисабнаан 100 процент хьибди. Пособие бицIир больницайиъ вая хулаъ сагъ апIурашра тувди. Му пул яшайишдин страхованиейин Фонднан бюджетдиан туврайиб ву. Думу гъадабгъбан бадали, аьлава документар уч апIувал лазим дар. Больничный кIажун улупбариз асас вуди, фондну чав гьисабар апIиди.
Гьацира больничный анжагъ сар дадайихьан ваъ, хъа хизандин ляхниъ айи фунур вакилихьанра оформить апIуз хьибди. Ясана думу хизандин вакиларихьан нубатнахъди гъадабгъуз хьибди.
7 йисаз вуйи бицIириз хъайивал апIуз йискьубаъ 60 йигъандин больничный гъадабгъуз шулу, 7-15 йисаз яш айи бицIириз лигуз сабишв’инди 15 йигъандин, йискьубаъ – 45 йигъандин больничный тувру, яш 15 йистIан артухъ дубхьнайи бицIириз лигуз – 7 йигъ, йискьубаъ – 30 йигъ тувру.
БицIир лап гъагъиди кетIерццнаш, больничныйдин вахт давам апIузра шулу.
Пособиейин кьадар, ккудушу кьюд йисандин кьялан маважиб гьисабназ гъадабгъну, тяйин апIуру. Эгер больничный пул МРОТ-тIан цIибди удубчIвураш, думу МРОТ-дин кьадарнаъди тувди.
«Гараждин амнистия»
1-пи сентябрихъан гьюкуматдин вая муниципалин хусусивалиъ айи гаражар ерлешмиш духьнайи жилар агьалйириз саб аьрза бикIувалиинди кьабул дапIнайи къайдайиъ тIауз мумкинвал туврайи къанунра гьяракатнаъ убчIвра. Мушваъ улхуб 2004-пи йисан 30-пи декабриз дибдиан тикмиш дапIнайи гаражарикан гъябгъюра.
2026-пи йисан 1-пи сентябриз пулсузди ва рягьят къайдайиинди жил ва дид’ин дивнайи дарамат оформить апIуз хьибди.
Журум апIбаз аькси аьрза онлайндиан тувувал
1-пи сентябрихъан гьацира рякъюнна транспортдин къайдйир дюрюрхювалиан журум апIбаз аькси аьрза онлайндиан тувуз шлу цIийи къайдара гьяракатнаъ убчIвра. Дициб аьрза, эгер техникайин мумкинвал аш, «Госуслуги» порталиъ вая суддин сайтдиъ тувуз хьибди.
Порталиъ регистрация дапIнайи автомобилин эйсийи аьрзайиъ къанунсузди чан журум дапIнайивал тасдикь апIурайи вари дюшюшар атIагну ккунду. Дидихъ хусуси къайдайиинди чан гафар субут апIурайи документарра, шикларра, видеора хъипуз хьибди.
Интернетдиъ хусуси мялуматар тарагъбан бадали, гьамус операторари агьалйирихьан разивал гъадабгъну ккунду
Чпин хусуси мялуматар тарагъбан зиин гюзчивал гъабхури, эгер дурар къанунсузди ирчнаш, гьамус агьалйирихьан фунуб-вушра интернет дакьатдикан шубуд йигъандин арайиъ дурар ктIушвуб тIалаб апIуз шулу.
Къанундиъ тасдикь дапIнайиси, дицдар мялуматар тарагъбан бадали, операторари Роскомнадзорин буйругъназ асас вуйи къайдайиинди агьалйирихьан разивал гъадабгъну ккунду. Дидиъ оператори хусуси мялуматар гъадагъбан метлебнакан, дурарин сиягьнакан, дурар гьяракатнаъ хьпан вахтнакан, ва гьацира жара касариз мялум хьуз хай даршлу жюрейин мялуматарикан дибикIну ккунду.
