Гьаму гьяфтайин талат йигъан Урусатдин правительствойин вице-премьер Татьяна Голиковайи 30-пи октябрилан башламиш дапIну 7-пи ноябризкьан Урусатдин вари регионариъ дилихру йигъар мялум апIбан теклиф дивнийи.
Урусатдин премьер-министр Михаил Мишустинди коронавирусдихъди женг гъабхурайи координационный советдин президиумдин заседаниейиъ Татьяна Голиковайин теклифнан тереф гъибиснийи. Гьацира Михаил Мишустинди сарпи вице-премьер Андрей Белоусовдиз ва экономикайин артмиш’валин министр Максим Решетниковдиз коронавирусдихъди арайиз дуфнайи аьгьвалатнаъ бизнесдин тереф уьбхбан цIийи теклифар гьязур апIувал табшурмиш гъапIну.
20-пи октябриъ РФ-йин Правительствойин членарихъди вуйи совещаниейиъ уьлкейин Президент Владимир Путинди вице-премьерин теклифнан тереф гъюбхну.
«Гьамусяаьт ихь улихь дийибгънайи асас месэла – ухьхьан удубкьрубкьан ватандашарин уьмур уьбхювал, коронавирусдин тIягъюн тарабгъувал шлубкьан яваш апIувал ву. Эпидемияйин цIийи «лепейиз» бару дивувал чарасуз ву. Гьаддихъди аьлакьалу вуди вари уьлкейиъ 30-пи октябрилан 7-пи ноябризкьан маважиб туври, дилихру йигъар мялум апIбан гьякьнаан вуйи теклифнан тереф бисураза», – гъапну Урусатдин Президент Владимир Путинди.
Регионарин гьюкмарихьан, айи аьгьвалатназ дилигну, дилихру йигъар ухди ккергъуз ясана хъасин давам апIуз шулу.
Гьаддихъди сабси уьлкейин Президентди гьамцдар теклифар дивну: тестар апIбан гьяракат яркьу апIувал; эгер хизандиъ сар кас аьзарлу гъахьнуш, тIягъюн тарабгъувал дебккбан бадали, хизандин имбуну вакиларизра больничный листар тувувал; аьзарлу духьнайидар хул’ан удудучIвувалихъди гьюкмари гюзчивал гъабхувал; вакцинайин руб йивбан кьяляхъ дилихру йигъар тувувал.
Владимир Путинди ватандашарикан прививкйир апIувал ккун гъапIну: «Ухьуз гьаму аьгьвалатнаан удучIвбан кьюб рякъ а: аьзарлу хьувал ясана вакцинайин руб йивувал. Уьзриз ккилигури гъузайиз вакцинайин руб гъивиш ужу шулу», – гъапну дугъу.
Дагъустандиъ 21-пи октябриз вуйи улупбариинди коронавирус уьзриан вари 54467 кас аьзарлу гъахьну (аьхиримжи йигъан 141 кас), думу кьадарнакан 50402 кас сагъ гъахьну (аьхиримжи йигъан 126 кас), гьамусяаьт иццурайидар 1381 кас ву, 2684 кас гъийихну (аьхиримжи йигъан 9 кас).
