9-пи ноябриъ «Дагъустан» РИА-йин конференцйир гъахру залиъ РД-йин милли политикайин ва диндин ляхнариз лигру министр Энрик Муслимов, республикайин СМИ-йин вакиларихъди гюрюшмиш гъахьнийи. Улихьна йигъари Энрик Муслимов кIулиъ айи Дагъустандин делегация Киргизияйиз гъубшнийи. Журналистарихъди вуйи гюрюшдиъ ВКС-дин къайдайиинди Киргизияйин вакил, Зита ва Гита Резахановарин (чиб-чпик карсну бабкан гъахьи кьюдюхрар) ччвурнахъ хъайи Жямяаьтлугъ фонднан кIулиъ айи Зумрият Резахановара иштирак гъахьнийи.
Энрик Муслимовди ихь республикайин делегация Киргизияйиз гъябгъбан натиж-йирикан ктибтнийи. Дугъан гафариинди, Киргизияйиз гъягъювал, Зумрият Резаха-новайин теклифназ жаваб вуди, Дагъустандин Глава Сергей Меликовдин табшуругъниинди тешкил гъапIуб вуйи.
Дагъустандин делегация Киргизияйин Чуйский областдин губернатор Эркин Тентишевдихъди, муфтий Замир Ракиевдихъди, Кир-гизияйиъ яшамиш шулайи Дагъустандин диаспорайин вакиларихъди гюрюшмиш гъабхьнийи.
«1936-пи йисан дагъустанлуйирин гизаф хизанар, кулак дапIну, айи мал-девлетра тадабгъну, Киргизияйиз алдаънийи. Дидхъан мина 85 йис тамам хьувализ бахш дапIну, областдиъ жюрбежюр серенжемар тешкил дапIнайи. Дагъустандин вакилар му-шваъ айи дагъустанлуйири аьхю гьюрматниинди кьабул гъапIнийи. Киргизияйиъ Дагъустандиан вуйи 15-20 агъзур кас яшамиш шула. Дурар гизафси лезги, дарги, авар, табасаран миллетарин вакилар ву.
Серенжемариъ удучIвну гъулху гьарсар касди гьаму жюрейин хялижвал тешкил апIбаз Сергей Меликовдиз чухсагъул мялум гъапIнийи. Киргизияйиъ яшамиш шулайи дагъустанлуйириз гизаф йисари бицIи ватандиъ чпикан гьархнайиганси, чпи гатIахьнайиганси гъахьну. Амма гьаму ражари ич делегация чпихьна гъювали рес-публикйирин арайиъ культурайин аьлакьйир цIийи алаувалик гьяракат кипну», – къайд гъапIнийи Энрик Муслимовди.
Дугъу туву мялуматариинди, Чуйский областдин губернатор Эркин Тен-тишевдихъди вуйи гюрюшдиъ терефари халкьарин ва регионарин арайиъ аьлакьйир тешкил апIбан месэлйир гьял гъапIну, хъа Киргизияйин муфтий Замир Ракиевдихъди вуйи гюрюшдиъ диндин цирк-лиъ Дагъустандихъди вуйи сатIи проектарикан гъулхну.
Гьацира Дагъустандин делегация ерли агьалйирихъди – Дагъустандин диаспорайин вакиларихъди, Октябрьский СОШ-дин директор – Дагъустандин вакил Мая Аьбдурягьмановайихъди гюрюшмиш гъабхьну.
Энрик Муслимовди къайд гъапIганси, думу мектебдиъ урхурайи 2000 бицIирикан 480 кас Дагъустандин миллетарин вакилар ву. Дурариз багъри чIал аьгъю апIуз ккунду. Киргизияйин образование-йин министерствойихъди баяр-шубар бабан чIалнан китабарихъди тямин апIбан, Дагъустандиан бабан чIалнан мялимарихъди манзилнаъди дарсар гъахувал тешкил апIбан гьякьнаан йикьрар гъапIну.
Зумрият Резахановайи Киргизияйиъ яшамиш шулайи Дагъустандин миллетарин вакиларин яшайишдикан ктибтнийи. Дугъан гафариинди, Киргизия дурарин ватан гъабхьну, амма ярхлаан бицIи ватандихьинди лигури, дурари саб вахтнара Дагъустандикан гьархрадар, ата-бабйирин аьдатар уьрхюра.
Зумрият Резахановайи къайд гъапIганси, дугъан тек-лифнан асас метлеб – бицIи ватандихъди аьлакьйир албагувал вуйи.
Энрик Муслимовди гьаму йисан аьхириз Киргизияйиан ерли муфтиятдин ва уьлкейиъ яшамиш шулайи Дагъустандин вакиларикан ибарат вуйи делегация ихь республикайиз гъювал планламиш дапIнайиваликанри хабар тувнийи.
Хъа 2022-пи йисан Дагъус-тандиъ Урусатдин жара регионариъ ва жара уьлкйириъ яшамиш шулайи ихь ватанагьлийирин форум гъабхувал планламиш дапIна.
