Гъябгъюрайи йисан 15 октябриъ чапдиан удубчIву «Табасарандин нурар» газатдин 41-пи нумрайиъ учу цци, 9-пи октябриъ Хючнаарин лицейдиъ кIули гъубшу, Надир-шагьдин кьушмар Дагъустандиъ дагъитмиш гъапIхъанмина 280 йис хьпаз бахш дапIнайи конференцияйикан яркьу мялуматар тувнийча.
Табасаран райондин администрацияйи ва ДГПУ-йин Дагъустандин тарихнан кафедрайин заведующий М. Р. Гьясановди тешкил гъапIу думу конференцияйин асас метлеб – миллетарин азадвал бадали дагъустандин халкьари сабхилди гъубху женгнаъ табасаранари уйнамиш гъапIу роль ахтармиш ва тяйин апIувал вуйи.
Гъи газат урхурайидар конференцияйин резолюцияйихъди ва дидин бинайиин кьабул гъапIу къарарихъди таниш апIурача.
«Надир-шагьдин кьушмар Дагъустандиъ дагъитмиш гъапIхъанмина 280 йис» илминна практикайин конференцияйин резолюция
Конференцияйин натижйир йивури, дидин иштиракчйири теклифар дивра:
Табасаран райондин администрацияйин улихь:
1. Табасаран райондиъ «Кьалухъ Мирзайин Йигъ» тяйин апIуб.
2. «Живанариз ватанпервервалин тербия тувбаз лигну» Кьалухъ Мирзайин ччвурнахъ хъайи медаль тешкил апIуб.
Табасаран райондин образованиейин управлениейин улихь:
Надир-шагьдин кьушмар дагъитмиш апIбакан вуйи документар, мялуматар ва материалар уч апIуб, дурар чап апIуб ва «Дагъустандин тарих» предметдин дарсариъ ишлетмиш апIуб.
Табасаран райондин гъуларин советарин главйирин ва мектебарин директорарин улихь:
1. Райондин вари гъуларин тарих уч ва гьязур апIуб
2. Мектебарин директорарихьна урхбан программайин мектебдин компонентдиан 1 сяаьт заан классариъ Дагъустандин тарих аьгъю апIру дарсариз жара апIбан мясляаьт хьади илтIикIуб».
Табасаран райондин депутатарин Собраниейин 28-пи октябриъ кIули гъубшу нубатнан заседаниейиъ райондин депутатари зиихъ къайд дапIнайи конференцияйиъ райондин кIулиъ айи Мягьямед Къурбановди адабгъу тялукь теклифназ гъилигну ва дидин бинайиинди къарар адабгъну:
«Дагъустандин гьюкуматдин педагогвалин университет» ФГБОУ-йин Дагъустандин тарих ахтармиш апIру кафедрайин заведующий Гьясанов Мягьямед Ражабовичдиз «Дагъустан Республикайин Табасаран райондин гьюрматлу ватандаш» кIуру ччвур тувуб.
«Табасарандин нурар» газатдин редакцияйин коллективди ихь машгьур аьлим, илмин бинайиинди табасарандин тарих дериндиан ахтармиш гъапIу ва думу ляхин гъира давам апIурайи Мягьямед Ражабович Гьясанов, чан гьар йигъандин марцци зегьметниинди гъазанмиш гъапIу му гьюрматлу ччвурнахъди кIваантIан тебрик апIура ва дугъаз жандин сагъ’вал, рюгьнан жигьилвал ва илмин цирклиъ хъана артухъ хъуркьувалар ккун апIура.
