21-пи декабриъ ДГПУ-йиъ «Табасаран чIал: думу уьбхювал ва артмиш апIувал» ччвур тувнайи форум кIули гъубшну. Душваъ РД-йин Халкьдин Собраниейин депутатар, Табасаран ва Хив районарин кIули айидар, чIалнан зиин лихурайи аьлимар, илмин гъуллугъчйир, гьюкуматдин идарйирин ва табасаран жямяаьтлугъдин вакилар иштирак гъахьну.
Форум Дагъгоспедуниверситетдин ректор вазифйир тамам апIурайи Нариман Асваровдин жягьтлувалиинди тешкил гъапIну ва кIули гъубшну.
Серенжемдиз уч духьнайдарихьна видеойихъан илтIикIну, Нариман Асваровди педуниверситетдиъ гьар йисан табасаран чIалнан Йигъ къайд апIувал аьдатнаъ ипувалин теклиф гъапIнийи.
«Гьамусдин гьялакди артмиш шулайи девриъ йигълан-йигъаз милли чIаларин кьисмат гъагъи шула. Гьаддиз ухьу тялукь серенжемар кми-кмиди гъахувал, чIалнан гьял дапIну адру месэлйир ахтармиш апIувал, рякъяр агувал чарасуз лазим ву. Хъа учвуз, форумдин иштиракчйириз, мянфяаьтлуди ляхин апIувал ва ужуб натижайихъна гъювал ккун апIураза»,
– гъапну Нариман Асваровичди.
ДГПУ-йин проректор Ибрагьим Дибировди мялум гъапIганси, филологияйин факультетдиз урхуз гъюрайи баяр-шубар чпин чIалнахъан ва ватандихъан юкIв убгурайи ватанпересар ву, фицики вари пулиинди ебцурайи гъийин девриъ мялимвалин пишейиз туврайи маважиб думукьан аьхюб даршра, дурари думу рякъ ктабгъура. «ДГПУ-йиъ дагъустандин филологияйин отделениейиъ табасаран группа, авар группайин кьяляхъ, кьюбпи йишв’ин ал. Гьаму гьякьикьатди табасаран халкь чпин чIал ва ватан ккуни, милли аьдатар уьрхюрайи ватанперес халкь вуйиб тасдикь апIура», – гъапну проректори.
Форумдин модератор, ДГПУ-йин дагъустан литературайин кафедрайин доцент Аьлибег Аьшурбеговди, гьял апIурайи месэлайин важиблуваликан ктибтури, багъри чIал аьгъяди хьувал – гележегдиъ милли культура уьбхбан ва артмиш апIбан заминвал ву кIури, къайд гъапIну.
Серенжемдиъ удучIвну гъулхдари, табасаран чIал уьбхбан рякъюъ кьабул дапIну ккуни уьлчмйирикан кIури, мектебариз методикайин пособйир, бабан чIалниинди литературайин китабар чапдиан адагъбан теклифар дивнийи.
РД-йин милли политикайин ва диндин ляхнариз лигру министр Энрик Муслимовди аьлава гъапIганси, багъри чIал имдарди гъабхьиш, думу халкьра имдру гьисаб ву. «Дагъгоспедуниверситетди му терефнаан гъабхурайи ляхин гизаф важиблуб ва чарасуз вуди давам дапIну ккуниб ву. Дурариз лазим вуйи вари шартIар яратмиш дапIну ккунду. Гьаддихъди сабси, вари жавабдарвал мектебариин ва вузариин илилипди, ухьу ихь хизанариъра му ляхин дубхну ккуниваликан гьархну ккундар», – гъапну министри.
РД-йин Халкьдин Собраниейин депутат Расим Гьяжиагъаевди, Табасаран райондин глава Мягьямед Къурбановди ва Хив райондин глава Ярмет Ярметовди чпин удучIвну улхбариъ, гележегдиъ багъри чIал зяиф дархьиди артмиш хьпан бадали, чпихьан шлу кюмек тувуз гьязур вуйиваликан гъапIнийи.
Форумдин дахилнаъди урхбаъ табасаран чIалнаан заан аьгъювалар улупу студентариз меценатари пулин пешкешар тувнийи. Студентари табасаран чIалниинди багъри юрдариз, культурайиз бахш дапIнайи шиърар гъурхнийи. Вуздин фойейикк табасаран халкьдин дуланажагъдин кюгьне авадлугъарин, рюкьяч-кьулин выставка ва табасаран литературайин стендар тешкил дапIнайи. Форумдин хялар студентари милли палат алабхьну къаршуламиш гъапIнийи.
Серенжемдин аьхириъ, багъри чIал ва литература уьрхбан ва гележегдиъ артмиш апIбан бадали, кьабул дапIну ккуни уьлчмйирин гьякьнаан тялукь табшуругъар кьабул гъапIнийи.
