Декабрин 31-пи йигъ вуйи. Узу ва гъардаш цIапIру хулаъ учIвубси, дадайи саб-кьюб дакьикьа улихьна чаз Йифун Аба гъяркъюваликан гъапнийчуз. Учу кьадар адрубкьан шад гъахьнийча. 

 

 

«Узу гъяркъиган, гучI дубхьну, Йифун Аба ихь бистниантина гьергну гъушну. Дугъ’ин юртнан чекмйир, уьру валжагъ, лизи бегьлийир алийи. Лизи мужрира ккайи. Йирфариин аьхю шишалра алийи. Узуз думу наанди гьергнуш гъяркъюнзуз…», – ктибтурайи дадайи. Учу дадайикан Йифун Аба гъушу йишв учуз улупуб ккун гъапIнийча. Учуз дугъахъ хъуркьуз ва думу хулаз хъади гъюз ккунди айчуз. Учу дадайин гьарсаб гафнахъ хъугърайча.
«Алахьай мани палтар. Думу агуз чара апIурхьа», – гъапнийи дадайи. Учу гьялакди курткйир хъахьну, чекмйир алахьну гьязур гъахьича. Дадайи учу бистнизди хъади гъушу.

Бистниъ дабхънайи йифуъ гизаф шилар адайи. Дураригъян Йифун Абайин юртнан шилар сабпну аьгъю шуйи. Саб гьарикк гъардшиз гъяфат гъябкъю. Хъасин узузра Йифун Абайи гъибтнайи шилнаъ гъяфат гъибихънийзуз. Учу дадайин улихьди жаргъури гъягъюз хъюгънийча. Думуган хъана гъяфтар али йишвариин алахънийчу. Гьарсаб ражари учу шадвалиан ва разивалиан гьарйирра апIури гъахьунча. Бистнин кьялаъ айи вичун гьарикк саб шишал гъибихъунчуз. Думу шишлиъ Йифун Абайи узуз ва гъардшиз пешкешар ивнайи.

Дидхъан мина хайлин йисар гъушну, амма му дюшюш йиз уьмриъ ЦIийи йисахъди аьлакьалу вуйи варитIан ужудар дюшюшарикан саб гъабхьну. Дадайиз чухсагъул. Дугъу узуз ва гъардшиз сюгьрихъ, ужудар ляхнарихъ, уж’валнахъ хъугъуз улупну. Хъа гьадму дюшюш, дугъриданра, сюгьюрлувал кайиб вуйи.