Чпин багъри ватан Дагъустан вуйи, амма дидхьан гизаф ярхлади ерлешмиш дубхьайи Санкт-Петербургдиъ дуланмиш шулайи ихь бицIи ватанагьлийирикан дагълу милли хурагарихъди таниш вуйидар гьеле-меле адар.

 

 

Уьлкейин Кафари меркездиъ яшамиш шулайи аьхюнубсиб пай инсанариз хинкIар, цIикбар, галар, афрар ва жара хурагар анжагъ шиклариктIан гъяркъдар дар. Хъа думу хурагарихъди багахьди таниш вуйи ихь ватандашари, гьамушваъ кми-кмиди сар-сарихьна хяларди гъягъюри, милли хурагар гьязур апIури шулу. Учура, Санкт-Петербург шагьриъ ихь бицIи ватанагьлийириз табасаран чIал улупурайидари, ихь халкьдин милли хурагар гьязур апIбаан гьар вазлиъ саб ражари мастер-класс гъабхуз йикьрар гъапIнийча. Сабпи ражари мициб серенжем чпин хулаъ тешкил апIуз гьадму шагьриъ яшамиш шулайи ихь ватанагьлийир Марат ва Эльвира Аслановари теклиф дивнийи.

Вари бицIидар дурарин хулаз уч гъахьиган, Эльвира Аслановайи ва гьацира ихь табасаран дишагьлийир вуйи Ифриз Мустафаевайи, Цюкер Рамазановайи ва Элина Клинжевайи баяр-шубариз табасаран халкьдин милли хурагарикан бицIи ихтилат гъапIну ва цIикбарин, хинкIарин жюрбежюр жюрйирикан, дурар гьязур апIбан къайдайикан, лазим шлу сурсатарикан ктибтну. Пичриин иливнайи йигьгиъ йикк убхьури имиди, дишагьлийири шубариз хамир ктIибшуз, кIем ккапIуз, абкIуз ва жигъригъихьди галар гьадатIуз улупну.

Хурагар гьязур апIбан къайдйир бицIидари чпин дафтрарик гъидикIну. Хъа 5-пи классдиъ урхурайи Раида Рамазановайи варидариз чайрахъна аварша гьязур апIуз хъюгънийи. ХинкIар, цикбар ва аварши гьязур гъахьиган, вари бицIидар иццидар хурагари ва меълишнари алацIнайи столихъ деу.
БицIи табасаран хялариз гюрюш лап кьабул гъабхьнийи. Дурари гьаму жюрейин серенжемар кми-кмиди гъахувал ккун гъапIийи.