ЦIийи йисандин гъаншариъ, гьюрматлу газат урхурайидар,учвуз табасаран шаирарин гьаму машквриз бахш дапIнайи шиърар урхуз теклиф апIурача.
Шюшеханум Керимова
ЦIИЙИ ЙИС
Гъабч, ЦIийи йис, уж’вал хьади уву гъабч!
Жил’инра илип лизи бархатдин чарч.
Лизишин адру кьюрд кьюрдуз ухшар дар,
Лизи апIин гьарар, рукчарин кушар.
Гьяйиф мапIан, улубз лизи аку ранг,
Махъвнансиб утканвалихъди жил албаг.
Хьадира гъабч гьарсаб хулаз мясляаьт,
Гъабч, ЦIийи йис! Ибшривуз ужуб сяаьт!
Аьзарлуйиз – сагъ’вал, гьисс адруриз – гьисс
Тувну ккуниб уву кIваълан магьархан.
Гъабч, убчIв уьмриъ, шадди гъюру ЦIийи йис,
Хъа ужуб гьич сарихьанра тадмабгъан!
Шихмягьямад Гьямидов
ЦIИЙИ ЙИСАН
Балгруганси уьмрин цирклар,
Шад шлуси вари наслар,
Гизаф ишри нурлу йигъар
Улубкьнайи цIийи йисан.
Гьюрмат ади агьалйириз,
Беркет ади хизанариз,
Кьимат ади гъапIу ляхниз
Уьмур балгри цIийи йисан.
Хулаъ ади веледдин сес,
Дадин кIвакра кади гьевес,
Мясляаьтди гъунши-мирас
Ибшри гьарган цIийи йисан.
Мягьсуларин бул бегьерар,
Мал-къарайин аьхю лижар,
Йимишари уьргъри багълар,
Тухъ хьад ибшри цIийи йисан.
Варидариз ади сабур,
Живанариз ади абур,
ЦIийи ляхнар лап такабур
Гизаф ишри ццийин йисан.
Уьмриин шад вуди наслар,
Дерерхьри зат дерднан ишлар,
Диври цIийи тикилишар,
Вахт гъарабхри ццийин йисан.
ЧIуру фикрар гьархну кIваълан,
Рази духьну кьисматнакан,
Дугъри рякъюъ ишри инсан
Улубкьнайи цIийи йисан.
Тяриф апIуз гъучагъарин,
Машар кацIуз алчагъарин,
Фагьум-мажлис къанунарин
Дикъат ибшри цIийи йисан.
КIваин алдру хатIа, завал,
Эйси имдру хизан ва хал,
Инсанариз жара харж’вал
Дярябкъри гьич цIийи йисан.
КIваин алди гьарган Аллагь,
АпIру ляхнихъ дарди русвагь,
Сари-сариз дарапIри агь,
Уьмур балгри цIийи йисан.
Хасуб ибшри шейънан кьимат,
Артухъ ибшри хатир-гьюрмат,
Сар касдизра харжиб кьисмат
Дарибшри зат цIийи йисан.
Абихъ ишри велед гъучагъ,
Фикир-ният вуди чан сагъ.
Гъит дюн’яра ибшри мублагъ
Улубкьнайи цIийи йисан!
Юсуф Базутаев
ЦIИЙИ ЙИС
Улихь цIикьюб кIаж гъяй тетрадь дипнайиз,
Марцци тетрадь, цIаркьан гьеле кадруб чак.
Жигьил фикрар, кIван хиялар – шиърар йиз
Урхри халкьди! – кауз ккундазуз душвак.
Марцци тетрадси, ЦIийи йис – цIикьюб ваз
Нежбрира гъи дипна магьа улихь чан.
Душна нежбер мани фикир-хиялназ
Гъюрай хьадкан, хутIларикан, дяхникан.
Гъябгъюри а йирси йис чан аьхириз.
Хилиъ вардин ацIу чяхрин а стакнар.
КIваълан гьадрархди нежбриз ва шаириз
Йипай, дустар, кIваантIан вуй ичв тостар:
– Ичв суфрай’ин али вари ипIруб-убхъруб
Ву яв зегьмет, дуст нежбер, ву яв гьунар.
Ибшривуз ЦIийи йис хъана аваданлуб,
Гьам стакнарси, дяхни ацIрияв амбрар!
Фу ву мажлис, шад мяъли чаъ деребхьру?
ЮкIв адру буш мухриз думу ухшар ву.
ЦIийи йисан вари халкьдин кIвак карсру,
Ялавлу вуй, шаир, дихъривуз гафар!
Гьяжимурад ТIаибов
ЦIИЙИ ЙИСАХЪДИ СЮГЬБАТ
Аьхъю микIлу арццну улдар явашди –
КубкIу йисаъ сарпи хялижв гъафунзуз.
Лизи йифун хил гьачIабккну гьялакди,
Кьан шулайси, салам тувну гъапунзуз:
– ЙицIикьюб вазлик сабан гъюру кас вуза.
Фу ужуб аш, вари айиз гьюрбйириъ.
Яв метлебар увхьан гьерхуз дуфназа.
Йипа адруб, фу ивза яв хилариъ?
– Чухсагъул вуз. Вари азуз, гьюрматлур,
ГьудрубкIрайиб гьамус узуз фу вухъа?
Ватан азуз, йиз гъул, халкьра – лап адлу,
МутIан аьхю девлет сарун фу ахъа?
Йиз дустарин кьялаъ суфра ккипназа.
Дурарин улихь дивруб азуз – юкIв ачухъ.
Халкьдин ляхник йиз ляхинра кипраза…
Ккимбуб сарун фу ву? Ккунирра узухъ.
– ТIалаб апIин. Гьациб аьдат айиб ву.
Хъа йиз метлеб – яв кIваъ узуз йишв бисуб.
ЙицIикьюб вазли увухъ лихуб йиз бурж ву.
Уьмриин саб раж дивуб. Йип яв кIуруб.
– ЦIийиб увхьан фукIара, дуст, ккундарзуз.
(Адруриз тув йиз ччвурнахъан)
Узуз айиб мабхан узхьан, миннат вуз,
Макадабгъан саб рубсибкьан ризкьнакан.
БицIи гъардшин мяъли мабхан увухьди.
Йиз кIваъ кархьнай аку гьиссар кам мапIан.
КIул’ин али ригъун нурар узухь гъит,
Хулаъ ерхьру бабан гафар кьатI мапIан.
– Адруб ча йип узхьан увуз – аьдат ву,
Яв улихь гъи йиз умбурра дивраза.
Уьмрин умбриъ лик дивуб яв буржи ву,
Фу дивруш вуз душваъ, увхьан гьерхраза.
– Вари азуз, гьудрубкIрайиб адарзуз.
Миннат вуйиз, узуз айиб узухь гъибт.
ЦIийиб увхьан фукIара, дуст, ккундарзуз.
Гужназ кархьу ислягь нурар узухь гъит.
Пирмягьямад Кьасумов
ХЯЛИЖВ ЙИБХЬ, ЦIИЙИ ЙИС
Салам тувну гъач вуз ккунирин хулаз,
Буюр, дуст, хялижв хьидива багьалу.
Метлебари ишара туврайич кIваз:
«Яв гъюру рякъ дубхьну ккунчуз ягъурлуб!»
«Мясляаьт» гаф пагь фукьан ширин дарин!
КатIатIарццди дид’ин тамарзу вуча.
Хилиъ дюн’яйин зегьметкеш халкьарин,
Мясляаьтназ жилав а, кади ачар.
Поезддин вагъунарси, чиб-чпихъди,
Гьяркат кади гъярашра яв гьарсад йис.
Ккилигурча бахтлу гележегдихъди,
Яв ягъурлу рякъюзра, жан ЦIийи йис.
Къазиаьгьмад Рамазанов
ЦIИЙИ ЙИСАН
Аьхъю йигъан сад январин,
КIваъ манишин шулу гьардин.
Гьаци гизаф вухьуз масан,
Аьлхъру машар цIийи йисан.
Бабар-чйир, дишагьлийир!
Ярхлаз ерхьри ичв мяълийир.
Беркет кайи хяр ва изан
Гизаф ишри цIийи йисан.
Бай адруриз бай ишри чаз,
Тай адруриз тай дихъри чаз.
Гъит дюн’яйиъ гьарсар инсан
Бахтлу ишри цIийи йисан.
Дявдин йифу дарабгъри укI,
Гьардиз ккубкьри ягъурлу чIукI.
Шагьриъ-гъулаъ гьарсаб хизан
Шадди гъузри цIийи йисан.
КIулиз рубкьри сагъ кIван хиял,
Даришри баб балихъ цIигал.
Яракь, кьушум адру майдан
Яркьу ибшри цIийи йисан.
Рамазан Рамазанов
ЦIИЙИ ЙИС МУБАРАК
Кьюрдун вазли йифар ади,
Хьадахъ кIуруш, бегьер хъади,
Аьлхъюри маш, юкIвра шадди,
Нежбер, ЦIийи йис мубарак.
Завод-фабрик ходнаъ ади,
Увухъ булди ляхин хъади,
Яв хизанра увкан шадди,
Фягьла, ЦIийи йис мубарак.
Ляхнихьна яв аьшкьра ади,
Тялимарин далу хъади,
Дурарикан уву шадди,
Мялим, ЦIийи йис мубарак.
Журнал абццган, «хьубар» ади,
Урхуз-бикIуз гьевес кади,
Гъюру уьмур сагъди, шадди,
Тялим, ЦIийи йис мубарак.
Кюребег Мурсалов
ЦIИЙИ ЙИС
Бабан сюгьрин махъвсиб машквар
Дуфна гьарсарин раккнихъна.
КIваин хури бицIи вахтар,
УдучIвурхьа гъи йифуккна.
Йифун цIиркIвар ахьра зав’ан,
Жилин нукьснар жин aпIури,
Гьаци харжиб дубгри айтIан,
Анжагъ ужуб ихь кIваъ гъубзри.
Валлагь, дустар, уьмриъ ухьуз
Гъубзруб анжагъ инсанвал ву.
Ухьу чиб-чпиз ширин гаф пуз,
Ахъли, ЦIийи йис, багьна ву.
Гъабч, ЦIийи йис, хушгел увуз,
Гъабч, шадвалар хури вардиз;
Йиз хизандиз, гъуншдиз, узуз,
Гьар гъянаъ юкIв айи касдиз.
Ккип лизи кьюрдун халачи,
Ккабалг дюн’я, бабу шинтси,
Ширин нивкIук рябкъру махъвси,
Гъабч, ЦIийи йис, хуш сюгьюрчи.
